Shillong, Nohprah 08
U Bah Alan West Kharkongor uba dei u kyrtong jong ka NPP ha ka ilekshon MLA na Sohra konsitwensi kaba la long mynshem snem u la pynpaw ka jingsngewkmen haba u MLA ba mynta u Bah Gavin Mylliem uba la jop na ka seng PDF u la rung noh sha ka seng NPP.
Haba ïakren bad u Bah Alan West Kharkongor, u la ïathuh ba kum u nongtrei ka seng NPP um don kano kano ka jingsngewdiaw ka mynsiem haba wan rung u Bah Gavin hynrei u la sngewkmen haba u wan rung ban pynkhlaiñ ïa ka seng NPP.
U la ïathuh ba ka seng NPP ka la pynkhreh ban ai tiket beit ïa u MLA ba mynta Bah Gavin hynrei ha ka por ba lyngkot u la kyntait ban rung sha ka NPP. Kumta u Bah Prestone u la bthah ïa u ban ïakhun ïa ka ilekshon khnang ban nym thylli ka konstitwensi.
“Wat la nga la ïeng dier por ha ka ilekshon hynrei nga la ïoh haduh 1598 vote, kine ki vote ki dei kiba ieid ïa nga bad don ki vote kiba ieid ïa ka seng NPP” u la ong.
U la pynpaw ba kum u nongtrei ka seng NPP u sngewkmen haba u MLA ka Sohra u Bah Gavin u la rung sha ka NPP na ka bynta ban pynkhlaiñ ïa ka seng ha ka ilekshon MP bad MDC ki ban sa long shen.
U la ïathuh ba ha ka seng NPP ha Sohra u dei tang u dkhot katba ha East Khasi Hills u bat kum u Secretary.
Wat la u Bah Alan West u khlem jop ïa ka ilekshon hynrei namar u dei u nongtrei ka seng NPP u la shah thung kum u Director ka Meghalaya Tourism Development Corporation (MTDC).
