Shillong, Rymphang 08
Ka Hynñiewtrep National Liberation Council (HNLC) ha ka Sngi Palei ka la pynbna ba ka la dep ai jingtip sha u Symbud Myntri Rangbah, u Bah Prestone Tynsong, ba ki nongïalam jong ka seng ki long kiba kloi ban ïakynduh bad u.
Haba pynbna ïa kane lyngba ka ‘Facebook’, u General Secretary bad Publicity Secretary ka HNLC, u Bah Saiñkupar Nongtraw, u la ong, “Nga la phah ktien sha u Bah Prestone ba ngi pdiang sngewbha ïa ka jingtyrwa jong u ban ïakynduh ïa ngi ki nongïalam ka HNLC ha kano-kano ka jaka.”
U Bah Saiñkupar u la ong ruh, “Ka jaka ngin pynbeit ma ngi da ka dei ha kano kano ka Ri…Ngin ai ïa u (Bah Prestone) ïa ka ‘safe passage’. Ngin pynbiang ka bam ka dih, ka jaka thiah jaka dem bad ngin sumar ïa u…Kumta ym dei ban artatien ne sheptieng.”
Kane ka jingthoh ka dei ka sien banyngkong hadien ba ka HNLC ka la pynbna ba ka la weng noh na ka jingïakren ïasuk bad ka Sorkar India bad Sorkar Meghalaya.
Lah ban kdew ba ha ka 19 tarik Kyllalyngkot, u Bah Prestone, haba kren sha ki lad pathai khubor, u la ong ba Sorkar Meghalaya bad Sorkar India ki la shimkhia ïa ka kam bad ki dang kwah ba ka jingïakren ïasuk bad ka seng HNLC kan dang bteng.
U la ong ba ki nongïalam ka HNLC lada ki sngew ba kam long shngaiñ ban ïakren ha ki jaka ka sorkar, ka sorkar ka kloi ban ïakren bad ki ha kano kano ka jaka ba ki pynbeit.
U Symbud Myntri Rangbah u la pynshai ruh ba ka jingkwah ban ïakren ka dei ban long beit bad ki nongïalam ba hakhmat ka HNLC namar ka sorkar ka kwah ban ïakren bad kiba lah ban shim ïa ka rai, ym bad ki dkhot kiba hadien ka jingïakren kin hap ban leit ban pyntip sha ki nongïalam ban shim ïa ka rai bad sa wan biang namar ka sorkar ka kwah ba kane ka kam kan poi noh sha kaba kut donkam ban ïakren markhmat bad kiba lah ban rai hangto-hangto.
U Bah Prestone u la ong ruh ba ka sorkar ka la leh ïa kaei kaba la kular bad ka khlem leh arsap ha kaba ha ka jingïakren ba nyngkong, la lah ban wan pynpoi suk ïa ki dkhot jong ka bad ruh ban leit on suk, katba ha kaba ïadei bad ka jingkwah ban weng noh ïa ka jingpynbna seng lehnoh, ka dei ban ïaid shwa ka jingïakren ynda la dep ban pynbeit ïa baroh ki mat, yn sa ïakren ïa kata.
U la ong ba ki daw ba la buh da ka HNLC hakhmat halor ka jingweng noh ïa ka jingïakren ïasuk ka long ba ka Sorkar India kam weng ïa ka jingpynbna seng lehnoh, hynrei dei ban sngewthuh ba ka Sorkar Jylla bad ka Sorkar Pdeng ki la shimkhia haduh mynta, bad u la buh ka jingkyrpad ba kin wan sha ka miej ïakren.
Ha kaba ïadei bad ka jingdawa ban weng lut ïa baroh ki mukotduma pyrshah ïa ka HNLC, u Bah Prestone u la ong ba ka sorkar ka la pan na ka HNLC ïa ka thup kyrteng jong baroh ki dkhot kiba don mukotduma ba haduh katno phew ngut kiba la shah mudui sha ka ïingbishar ne shah pynngat ha ki kyndon aiñ khnang ba kum ka sorkar kan lah ban peit bad bishar bniah bad ban lah pat ban ïakren ha ki jingïakren ban wan hynrei ka seng kam shym la lah ban pynbiang ne ai ïa kata ka thup kyrteng.
