Shillong, Rymphang 08
Wat la kiwei seng saiñ pyrthei ki la nang ïaid shakhmat ha ka ban leit ïalap bad pan jingkyrshan na ki paidbah ïa la ki kyrtong ba kin pynïeng hynrei ka seng Bharatiya Janata Party (BJP) kat haduh mynta kam pat khih khohreh ban pynbna kyrtong.
Nalor ka jingleit ïalap ilekshon, kiba bun ki seng saiñ pyrthei ki la dep ruh ban pynbna ïa la ki kyrtong ban ïakhun ïa ka ilekshon MP na ki ar tylli ki konstitwensi ha Jylla, hynrei ka BJP haduh mynta ka dang bishar ïano kan sei ban pynïakhun.
Na ka liang jong u M Chuba Ao uba dei u in-charge ka BJP ha Meghalaya ha ka Sngi Palei u la ong na ka liang ka seng ka dang peit bad khmih bniah bad kheiñ jingkheiñ ba mano napdeng kiba la pan tiket kin kham ïoh ka jingkyrshan na ki paidbah nongthep vote.
Lah ban kdew hangne ba ki don haduh ar ngut napdeng ki nongïalam ka seng kiba la pan tiket na ka BJP ban ïakhun na Shillong Parliamentary Constituency katba na Tura pat ki la don kumba 3 ne 4 ngut kiba la pan tiket.
Haba pynshai lypa ba na ka liang jong ka seng kan sa sdang ïa ka jingleit ïalap ilekshon tang hadien ynda la pynbna ïa ki tarik pynlong ilekshon, u Chuba Ao u la kam ba wat la ki nongthep vote ha Meghalaya ki la phai khmat sha ki seng riewlum ha ka ilekshon kaba la dep, hynrei mynta ka kynti u la ïoh ka khubor ba ka jingsngew ki paidbah ka la sdang kylla bad kwah ban kyrshan ïa u Narendra Modi.
Kumba ka long mynta, ki seng kiba la dep ban pynbna ïa ki kyrtong ban ïakhun ha ka ilekshon MP ki kynthup ïa ka NPP, UDP bad VPP bad wat na ka liang ka Congress ruh ka la pynbna ba kan pynïeng da u MP ba mynta u Bah Vincent H Pala na Shillong bad u Saleng Sangma na Tura, katba na ka liang ka TMC bad BJP haduh mynta kim pat pynbna satia ïa ki kyrtong.
