Shillong, Rymphang 08
Ka Meghalaya High Court ha ka Sngi Palei ka la ai hukum ban maramot noh mardor ïa ka surokbah National Highway-6 bad ka la pynpaw ïa ka jingkyndit ban ïohi ïa ka jingjot rathai jong kane ka surok.
Ha kane ka sngi, u nongmudui, u Bah Kynjaimon Amse, u la ai da ka jingthoh kaba long kum ka jubab ïa ka jingthoh na ka National Highways Authority of India (NHAI), sorkar jylla bad kiwei.
Ha kane ka jingthoh, u Bah Amse u la tyngkhap lang ïa ki dur ki dar kiba la shon ha ka 26 tarik Kyllalyngkot, 2024 ha surokbah NH-6 ba kynthup ïa ka shnong Sonapyrdi, Sonapur Tunnel, Kuliang, Pyrtakuna, Dona Umbluh bad Ratacherra-Malidor (Assam Border).
Na ka liang ka High Court, hadien ba ka la peit ïa ki dur ki dar, ka la pynpaw ïa ka jingkyndit halor ka jinglong jingman jong ka surok khamtam ha ka shnong Kuliang bad Pyrtakuna. Ka la ong ba tang shu peit na ki dur ruh la ithuh ba ka jingkieng kam long shuh kaba biang ban ïaid ki kali.
Wat la na ka liang u muktiar ka NHAI u la pyntip ba la dep ban jied ïa ki kontraktor ban maramot ïa ka surokbah, ka High Court ka la ong ba la donkam kyrkieh ban maramot.
Na ka liang ka High Court ka la pynpaw ba ka khmih lynti ba kan don ka jingmaramot ba kyrkieh ïa katei ka surok, bad ka jingbishar ïa kane ka mukotduma kan long biang ha ka 5 tarik Lber.
