Shillong, Rymphang 08
U Bah A.L Hek uba long u nongïalam ka Bharatiya Janata Party (BJP) ha Meghalaya u la ong ba ka jingslem ban pynbna kyrtong ka BJP ka dei namar ka jingbym pat shim rai da ki nongïalam ba hakhlieh ka seng na Delhi.
Haba kubur ba ka jingpynslem ban pynbna ïa ki kyrtong ka lah ban ktah bha ïa ka BJP ha ka ilekshon Lok Sabha 2024 ha Jylla, u Bah Hek uba dei ruh u Myntri Sorkar Jylla u la ong, “Kaei ngin lah ban leh, ngim lah ban leh eiei namar ïa ka rai yn shim hi da ki nongïalam ba khliehduh ka BJP.”
Kumba ka long mynta, kiba bun ki seng saiñ pyrthei nalor ba ki la dep ban pynbna ïa la ki kyrtong ban ïakhun ïa ka ilekshon MP, ki la sdang ruh ïa ka jingleit ïalap ilekshon ha kylleng ki jaka hynrei na ka liang ka BJP kam pat lah ban pynbna ïa ki kyrtong ki ban ïakhun na Shillong bad Tura Parliamentary Constituency.
Haba kylli, u Bah Hek u la ong ba haduh mynta kam pat don ka jingïalang bad ki nongïalam ba khliehduh ka BJP bad kumta un nym lah ban ai jingtip haba ïadei bad ki kyrteng jong ki kyrtong ban ïakhun na ki 2 tylli ki constituency hapoh ka jylla.
Katkum ki khubor kiba la paw, u President barim ka BJP Meghalaya u Bah Ernest Marwrie lem bad ka Muktiar ka Supreme Court ka Kong Fenela L Nonglait kiba la pan tiket na Shillong nalor u Bah AL Hek, katba u MDC ka Tura bad u State Vice President ka BJP u Bernard Marak, u kyrtong na Songsak u Thomas Marak bad u CEM barim ka GHADCu Boston Marak kila paw kum ki kyrtong na Tura.
