Shillong, Rymphang 08
Ka KSU Mawlai Circle ha ka Sngi Palei ka la leit ban ai da ka jingujor sha u Principal jong ka Sacred Heart Boys’ Higher Secondary u Fr T. Kharsyntiew halor ka jingthoh bakla ïa ka kyrteng jong ka shnong Mawlai ha ki sweater jong ki khynnah kane ka skul.
Ka seng ha ka kyrwoh khubor ba la pyllait ka la ong, katkum ka jingthoh ha ki sweater kane ka skul ha ka jaka ban thoh ‘Mawlai’ la thoh pynban ‘Mawali’, bad kane ka jingbakla ban thoh ïa ka kyrteng jong ka shnong Mawlai ka la ktah bad wanrah ka jingsngewdiaw ïa kiba bun ki paidbah nongshong shnong ka shnong Mawlai kumjuh ïa ki khynnah ba pule ha katei ka skul.
Kumta na ka liang ka seng ka la ïoh ban pynsngew sha u Principal ba un khmih bad phah pynbeit noh ïa kane ka jingthoh bakla bad ban ai noh da kiwei ki sweater kiba biang bad ba beit ka jingthoh bad spel dak kaba dei jong ka shnong Mawlai.
Na ka liang u Principal u la pyntip sha ka seng ba na ka liang ka skul ka don ka jingïateh bad ka HB Textiles (school uniform embroidery dealership) na ka bynta ban pynbiang ïa ki uniform school jong ki khynnah bad ka don ka jingleh bakla na ka liang ka HB Textiles bad mar sien ïoh jingtip ba ka don ka jingthoh bakla ha ki sweater, u la phah pynbna ha assembly ban phah lum lut baroh ki sweater jong ki khynnah ba don ka jingbakla ka jingthoh. Nangta u la pyntip ruh ba ki sweater kiba don ka jingbakla ka jingthoh ki dei na ka size 26 bad 38 bad ym baroh jong ki khynnah skul.
La ong ba ha kaba ïadei bad kane, na ka liang u Principal u la pynpaw ruh kum ka skul hi baroh kawei ki don jingsngewsih ha kaba ïadei bad ka jingthoh bakla ïa ka kyrteng jong ka shnong Mawlai namar kane ka jingbakla ka la ktah ïa ka skul bad ka shnong Mawlai hi baroh kawei. U la pyntip ruh na ka liang ka skul ka la shimkhia bad kan nym dei shuh ban dang jia kumne ha ki por ban sa wan.
La pynkut ka kyrwoh ba la pyllait da u samla Gary Mawlieh uba dei u Publicity Secretary ka KSU Mawlai Circle.
