Shillong, Rymphang:
Hadien ka jingsngewthuh jingmut hapdeng ka tnad Pynroi Sor ka sorkar jylla bad ka Dorbar Shnong Pynthorumkhrah Golflink, ka sorkar Jylla lyngba ka tnad Pynroi Sor ha ka Sngi Ba-ar ka la mynjur ba ka Dorbar Shnong Pynthorumkhrah Golflink ka dei ban peit ban sumar bad ban pynïaid ïa ka Children’s Park kaba don ha lyndet jong ka Hawker’s Market, Golflink ter-ter shaduh Dogs Squad. Ka jingïoh ïa kane ka jingmynjur ka dei hadien ba u MLA ka Pynthorumkhrah Constituency, u Bah Alexander L. Hek u la lum da ka jingïalang ha ka Sngi Ba-ar hapdeng ki nongkitkam jong ka shnong Pynthorumkhrah-Golflink bad ki ophisar ka tnat pynroi sor jong ka sorkar jylla.
Ha katei ka jingïalang ba la pynlong ha katei ka sngi, la sakhi lang da u Director ka tnat pynroi sor, u Bah E. Kharmalki, u Superintendent Engineer, u Bah K. Wahlang, u Rangbah Shnong, u Bah Michael Hek nalor kiwei-kiwei ki nongkitkam ka shnong
Na ka liang ka Dorbar Shnong Pynthorumkhrah-Golflink ha ka Lah Sngi U Blei ka la phah da ka jingthoh sha u Myntri Rangbah ka Jylla, u Conrad K. Sangma ban pyrshah lada aiti ban pynïaid ïa katei ka Park sha ka Shillong Golf Club.
Ha ki khyndiat sngi, na ka liang ka Dorbar Shong bad u MLA ki la pynlong ka jingjurip ïa ka jaka kaba don ha lyndet jong ka Hawker’s Market, Golflink ter ter shaduh Dogs Squad na ka bynta ban shna ïa ka Children’s Park bad ha kajuh ka por ka Dorbar Shnong ka la pynpaw hakhmat u MLA ba kan pyrshah lada aiti ïa ka Shillong Golf Club ban pynïaid ïa katei ka Park.
Haba pynpaw halor ka jingthmu ban shna ïa ka Children’s Park, u Bah A.L Hek uba dei u Myntri ka sorkar jylla u la ong ba katei ka Park ka dei ka projek na ka bynta ka bha ka miat hapoh ka shnong ka thaw bad ka ban pynmyntoi ïa ki paidbah bad ïa ka shnong Pynthorumkhrah-Golflink baroh kawei.
Shuh shuh na ka liang ki nongkitkam ka Dorbar Shnong ki la mynjur ba kim don satia kano-kano ka jingpyrshah ïa ka projek hynrei ki don ka jingsngewkhia ba ki samla jong ka shnong ki dei ban ïoh ïa ki kam ki jam lyngba kane ka projek. Hapdeng ka jingïasngewthuh jingmut hapdeng ki arliang mamla, na ka liang ki ophisar ka tnat pynroi sor ki la pynpaw ba kim don kano-kano ka jingsngew artatien ban ailad ïa ka Dorbar Shnong ba kan pynïaid hi bad ban sumar ïa katei ka Park bad ïa ka soskular ïasngewthuh jingmut yn sa pynkhreh shwa ban aiti sha ka Dorbar Shnong.
