Shillong, Rymphang:
Ka tnat Korbar Ri jong ka Sorkar Pdeng ka la rai ban pyndam noh ïa ka “Free Movement Regime” (FMR) hapdeng ka India bad ka Myanmar khnang ban pynthikna ba kan don ka jingshngaiñ bad ba kan ym don jingktah ïa ki nongshong shnong ha ka thaiñ Shatei Lam Mihngi kiba don ïa u pud u sam bad ka Myanmar.
U khappud jong ka India bad Myanmar lane ka Indo-Myanmar Border u jrong haduh 1,643 km bad ki jylla ka thaiñ Shatei Lam Mihngi kiba don marjan bad ka Myanmar ki long ka Arunachal Pradesh (520 km), Nagaland (215 km), Manipur (398 km) bad Mizoram (510 km). Ïa une u khappud la pahara da ki Assam Rifles bad ym da ki Border Security Force (BSF).
Katkum ka FMR, ki nongshong shnong la ki dei na India ne Myanmar, bad kiba shong ba sah ha ki shnong ki thaw kiba jngai hapoh 16 km na u khappud, ki lah ban leit na shiliang sha shiliang da kaba rah ïa ka ‘Border Pass’ ba la ai da ki bor ba dei khmih bad ki lah ban sah kumba ar taïew ha ka shisien leit.
Haba pyntip halor kane ka jingpyndam ïa ka FMR, u Myntri Korbar Ri, u Amit Shah, u la ong, “Ka dei ka jingkut jingmut jong u Myntri Rangbahduh, u Narendra Modi, ban pynkhlaiñ bad pynshngaiñ ïa ki jaka kiba don ha khappud. Namarkata, ka tnat Korbar Ri ka la rai ba ïa ka ‘Free Movement Regime’ (FMR) hapdeng ka India bad ka Myanmar yn pyndam noh khnang ban pynkhlaiñ ïa ka jinglong shngaiñ jong ka Ri bad khamtam ba kan ym ktah ïa ki nongshong shnong ka thaiñ Shatei Lam Mihngi kiba don ïa u pud u sam bad ka Myanmar. Namar ka tnat bar ri (Ministry of External Affairs) ka dang don hapdeng ka kam ban pyndam noh ïa ka FMR, ka tnat Korbar Ri ka la ai jingmut ban pynsangeh noh shwa ïa ka FMR.”
