Shillong, Rymphang 09
Ka Khasi Student’s Union (KSU) Lawbah Circle ha ka Sngi Thohdieng jong ka 9 tarik u Rymphang, ka la wan shakhmat ban pynsngew ha kaba ïadei bad ka jingsniew ka surok na Nongtrai ter ter shaduh Shella kaba hap hapoh ka thaiñ Mawsynram Constituency.
Kane ka long hadien ba ka seng ka la ïohpdiang ïa ki jingud jingnam na ki paidbah nongshong shnong jong katei ka thaiñ bad khamtam eh na ki nongshong shnong ka Nongtrai ha kaba ïadei bad ka jingsniew palat jong katei ka surok namar ka jingpynsahteng ban shna ïa ka bad pynlong ruh ïa ki paidbah nongleit nongwan ba kin ïakynduh jingeh shikat dei eh.
Haba kren sha ki lad pathai khubor ha Shillong Press Club, u President ka KSU Lawbah Circle, u Bah Samborlang Shabong, u la ong ba katei ka jingpynsahteng ïa katei ka surok ban shna ka la don mynta la 2 snem eiei bad la ïohi kumba kan sa jah rngai noh ha ka ban pyndep ïa katei ka surok ban shna.
U la ong ba ka jingjrong jong katei ka surok ka long kumba 6 kilometre eiei na ka shnong Nongtrai sha Shella bad kaba la dep ban siang rong ka dei kumba 5 kilometre bad kaba dang sahteng mynta ka dei sa 1 kilometre tam eiei ba ka PWD kam pat pyndep. Ïa katei ka surok la bei tyngka da ka SPVS hynrei la peit bad khmih pat da ka PWD Mawsynram Division.
U Bah Samborlang u la ong ruh ba ka jingmyntoi jong kane ka surok kam dei tang na ka bynta ki nongshong shnong ka Nongtrai hynrei kane ka surok ka don shibun ki jingmyntoi khamtam ba katei ka surok ka dei kaba ïasnoh bad ki ïew ki hat.
“Haduh mynta ki nong Mawsynram, Lawbah bad ki Nongtrai kim ju leit ïew sha Shella namar bym don surok bad ka long kaba sniew tasam, hynrei lada ka PWD kan pyndep noh ïa kane ka surok, ki shnong ba marjan baroh kin ïoh ban leit ïew leit hat sha Shella bad sha ki ïew kiba marjan”, la bynrap u Bah Samborlang.
Na ka liang ka seng ka la phah ka khubor sha ka tnad PWD Mawsynram Division bad sha u Myntri ba dei khmih ïa ka surok bad kumjuh ruh sha u MLA bad u MDC ka Mawsynram ba ki dei ban leh eiei noh halor kane ban pynbha shisyndon ïa kane ka surok ba dang sahteng.
Shuh shuh u Bah Samborlang u la ïathuh ba na ka liang ka seng ka la buddien bha ha kaba ïadei bad katei ka surok naduh u snem ba la dep da kaba ki leit ban ïakren bad u Executive Engineer ka PWD Mawsynram Division hynrei namar ki jingbym ïoh jingshai bha, ka la pynlong ïa ka seng ban wad da ka RTI. Ha katei ka RTI, la pyni ba ka daw ba sahteng ka surok ban shna ka dei na kata ka jingjur slap hynrei ha ka jingshem jong ka seng kam da dei eh na ka jingjur jong u slap haduh ban da sangeh pyntrei ïa ka kam namar ka por tlang ka dei ka por bym hap slap sha kitei ki thaiñ.
“Kane ka pyni ba ka don kaei-kaei sha lyndet, ngi sngew ban kyntu ïa ka PWD ba ka dei ban pyndep noh ïa kane ka surok lym kumta na ka liang jong ngi ka seng ngin shim ïa ki rai kiba kham tyngeh”, la ong u Bah Samborlang.
