Shillong, Rymphang:
Ki Jylla ha ka Thaiñ Shatei Lam Mihngi ki duna ka jinglah ban pyndonkam ïa ka pisa kaba la mang ïa ki kam pynroi bad kane ka la pynlong ruh ïa ka Sorkar Pdeng ban nym lah ban pynkiew shuh shuh ïa ka mang tyngka na ka bynta ka North Eastern Council (NEC).
U Secretary ka NEC u K Moses Chalai haba kren sha ki lad pathai khubor ha Shillong ha ka Sngi Palei, u la ong ba ki Sorkar Jylla ha kane ka thaiñ ki la shim ki lad ki lynti kumno ban kham sted ka rukom pyntreikam ïa ki projek bad ban lah ban pyni ïa ka jinglah ban pyndonkam ïa ka pisa kaba la mang.
U Chalai u kubur ruh ba ka jinglong jingman jong ki jaka ka dei kawei na ki daw ba ym lah ban pynsted ïa ki kam bad lehse ym shym la lah ban pyntrei sted ïa ki projek bad ban pyndonkam lut ïa ka pisa kaba la mang.
Ha ka jingshisha, la ju ïohsngew ba ki Jylla ha Thaiñ Shatei Lam Mihngi ki duna ka jinglah ban pyndonkam ïa ka pisa kaba mang lyngba ka NEC sha ki Jylla bapher bapher bad ka NEC ruh kam lah ban mang kham bun ka pisa na uwei u snem sha uwei pat.
U Chalai u la ai nuksa ba ka tnat DONER ka ju mang tang kumba T.3,000 klur hynrei lem bad ka PM-DIVINE, ka Sorkar Pdeng ka la mang kumba T.6000 klur. Haba kylli shaphang ki jingsuki ki projek ha Meghalaya bad ka dawbah kaba khanglad ban pyntrei ïa ki kam pynroi, u Chalai u kubur ba ha Meghalaya ki don ki projek kiba long ka dawbah bad ym lah ban pynïaid shaphrang. U la ong ba ki katto katne ki projek ka NEC ha Meghalaya kiba ka Sorkar Jylla kam pat lah ban pynbeit ïa ka jingeh namar ka jaka.
U ong ba u sngewthuh bha kum u riewlum namar ka khyndew ka dei ka mat kaba thnam bha bad bad ka por la donkam ban pynïar ïa ka jingmut jingpyrkhat namar lada ong ba kwah surok, hynrei ong pat ba ym lah ban ai jaka.
U Chalai u la ong ruh ba um kwah ban shim kyrteng ïa ki Jylla haba ïadei bad ka rukom pyntreikam ïa ki projek kiba wan lyngba ka NEC namar kawei ka Jylla ka ïapher na kawei pat bad kim long kumjuh. Kumta u ong ba ka jingmang pisa ka Sorkar Pdeng ïa ka NEC ka long katkum ka jinglah ban pyndonkam ban pyntrei ïa ki projek.
Kumta u la u ong ba ka Sorkar Pdeng ka sngewthuh ïa ka jinglah bor ki Jylla hapoh ka Thaiñ Shatei Lam Mihngi bad u kyrmen ba ka Sorkar Pdeng kan kham pynkiew shuh shuh ïa ka jingmang pisa lyngba ka jinglah ki Jylla ha kane ka thaiñ ban pyni ïa ka rukom pyntreikam ïa ki projek bapher bapher.
