Shillong, Rymphang:
Ka khynnah kaba dang khie dang san ka Haphilakmen Lyngdoh, 17 snem ka rta kaba dei shnong na Shella, East Khasi Hills District kam shym la poi pyrkhat ba ha ka rta ba dang khynnah kan ïoh rah ïa ka song pisa kaba T.1 lak tyngka na ka jingïakob shad ha ka 4th khasi Dancing & Singing Competition 2023 ba la pynïaid da ka phlim ‘Dhaka Escape’ bad pynmih da ka Chwa Syiemlieh Film Production.
Ka Haphilalmen ka don lai ngut shipara. Naduh u snem 2022 ka la wan shong skul noh sha Shillong bad ka shong klas-9 ha kawei ka skul ha Nongmensong. Kane ka khynnah ka ju smat ban pynlut ïa ka por ha ka ban khreh kot bad hikai shad.
Kane ka khynnah ka la sdang ban pyni ïa ka sap shad ha ki rynsan social media ha ka por ba ka pyrthei baroh kawei ka dang khangdam na ka jingwan ka khlam Covid-19 da kaba shim bynta nyngkong ha ka 1st Khasi Dancing & Singing Competition 2021 ba la pynïaid da ka phlim ‘Jingim’ bad pynmih da ka Chwa Syiemlieh Film Production. Pynban ha kane ka jingïakob ka shu ïoh tang ka Special Prize.
Haba kane khynnah ka la ïoh lad biang ban shim bynta ha ka 2nd Khasi Dancing & Singing Competition, ka la ïoh tang ka consolation prize. Kumta dei ha ka 4th Khasi Dancing & Singing Competition ka la ïoh rah syndon ïa ka khusnam kaba T.1 lak napdeng ki 106 ngut kiba la poi sha ka phainal kaba la long ha ka 12 bad 13 tarik u Kyllalyngkot 2024 ha Khasi National Dorbar Hall Mawkhar.
Haba ïoh ban ïakren kyrpang bad kane ka khynnah ha ïingsah ha Shillong ka la ïathuh ba ïa kane ka pisa kaba la ïoh kan buh bha namar kan bteng ban pyndep ïa ka jingpule haduh ban da heh.
Ka la ïathuh ba ka sdang ban shad ha ki prokram ha shnong ha Shella bad ka la sdang ban ïashimbynta ha ki rynsan ki jingïakob shad kiba heh ka dei ha ka por khangdam haba ka phlim Jingim ka la pynlong ka jingïakob shad lyngba ka Online ban thep ha Youtube.
“Ngam poi pyrkhat ba ngan ïoh rah ïa ka song pisa kaba shi lak tyngka haba nga dang leit skul hynrei ngan dang bteng ban shad haduh ba ngan da pyndep ïa ka jingpule” ka la ong.
Ka la kyntu ïa ki hep barit bad ki samla haba ki shah rem ha ki jingïakob kim dei ban duh mynsiem hynrei kin pyrshang beit haduh ban da jop namar ma ka ka la jop hadien ba la shah rem ha bun tylli ki jingïakob.
