Shillong, Rymphang 09
Ka Jylla Meghalaya kan sa ïoh tam ka bhah kumba T.2000 klur lyngba ka ‘Special Assistance on Capital Investment’ jong ka Sorkar Pdeng na ka bynta ki kam pynroi bapher bapher ha sor kynthup ban tei ïa ki projek thymmai bad ban maramot ïa kiba la don.
Ïa kane la ïathuh da u Myntri Rangbah u Conrad Sangma hadien ka jingïalang ka Kynhun Myntri ha ka Sngi Thohdieng, ha kaba la ai jingmynjur ïa ka Shillong Urban Mobility Policy, 2024 kaba dei ka mat treikam kaba kynthup ban pynbiang ïa ki jingdonkam ki nongshong shnong ha jaka sor kum ka jingbiang ki kali ban leit jingleit ki paidbah, ki jaka ïaid lynti, ki lad ban pynduna ïa ka jingkhapngiah da kaba tei shuh shuh ïa ki jaka pynïeng kali bad kiwei kiwei ki jingtei kiba donkam naduh ka jingpynbha ïa ki bynta jong ki wah bad kumta ter ter.
U la ong ba ha ryngkat ka T.700 klur kaba la mang ban ai ïa ka Jylla, yn sa ïoh shuh ïa ka pisa ka ban kot T.2000 klur mynta u snem lyngba ka special assistance on capital investment kaba long kum ka jingai bhah namar ka jinglah ka Jylla ban pyndonkam ïa ka pisa. U la ïathuh ba na ka T.15,000 klur, ngi buh ka jingtyrwa kumba T. 619 klur bad ngi la dep ïoh ïa ka jingmynjur kaba jan kot T.500 klur mynta.
Kumta u la ong ba lyngba kane ka mat treikam (policy) kan long ka jingkdew kumno ban shim ki sienjam ha kaba ka Kynhun Myntri ka la ai jingmynjur ïa kane ka ban long ka jingpeit jngai lypa kumno ban pynbha ïa ka rukom im bad jinglong jingman ha sor. U la ong ba ka Sorkar Jylla kan sa wanrah ruh la ka jong ka policy na ka bynta kiwei ki jaka ba la don ïa ka jinglong sor ha ki district bapher bapher namar kane ka policy ka dei thik tang ïa ka nongbah Shillong.
Ha kawei pat ka liang, ka Kynhun Myntri ka la ai jingmynjur ruh ban pynkylla ïa ka Building Byelaws, 2021 ha kaba yn bud ruh ïa ki jingbatai ka Sorkar Pdeng haba ïadei bad ki katto katne ki kyndon khamtam ban tei ïa ki ïing kiba don jingma ha ki jaka kiba long sharing.
U la ong ba ki jaka kiba ka jinglong sharing ka long kumba 50 degree, ym lah ban ai jingbit ban tei ïing.
Katkum kane ka jingpynkylla ïa ki kyndon, la shah ruh ïa kiba don jaka kaba rit ban shna ïing da kaba kham pynduna ïa ka jingjngai hapdeng ka ïing bad u pud sawdong jong ka jaka. U Myntri Rangbah u la ong ba ha kane ka jingpynkylla, ki jingtei kiba palat 27 metre shajrong ki hap shim jingbit na ka MUDA, katba kiwei pat ki jaka ki hap hapoh ka jingpeit ki District Council ki hap ïaid katkum ki kyndon jong ki District Council. U la ong ba kane ka jingwanrah ïa ki jingpynkylla hapoh kane ka kyndon aiñ ka dei na ka bynta ka jingshngaiñ kaba long ruh katkum ka jingbuh kyndon ka Sorkar Pdeng haba ïadei bad ki jaka sor.
