Shillong, Rymphang 09
U Myntri Rangbah ka Jylla u Conrad K Sangma, u la pynpaw biang ba ka jingkhang ka plie ban ïakren bad ka Hynñiewtrep National Liberation Council (HNLC) katkum ki kyndon kiba don bad ka tnat Korbar Ri (Ministry of Home Affairs) jong ka ri.
U la kyrpad ïa ka HNLC ban phaidien biang ïa ka rai kaba la dep shim hynrei ban poi biang sha ka jingïakren.
“Ngi kwah ïa ka suk ka saiñ kaba neh bad nga banjur biang ba ngi dei ban ïakren,” u la ong da kaba bynrap ba ka Sorkar Jylla na ka por sha ka por ka la ong ba ki don ki kyndon kiba ka MHA ka la buh bad kiba la bud ruh na bynta kiwei pat ki seng kiba ka Sorkar Pdeng ka la ïakren bad ym lah ban lait na kita ki kyndon.
U la ong lada dei ba hap ban pynkylla na ka bynta kawei ka kynhun, lehse hap ban pynkylla lang na ka bynta kiwei ruh bad dei na kata ka daw ba ka jingïakren ka ïaid hapoh ki kyndon ka MHA.
Hynrei u la ong ba haba ïadei bad ka jinghap ïa ki kam beaiñ kiba la leh mynshwa, ka shong katkum ki ‘case’, hynrei lada ym sdang ïa ka jingïakren yn nym lah ban poi sha kaba thmu. Ka HNLC ka la weng noh na ka jingïashim bynta ban ïakren kaba lai mamla hapdeng jong ka, lem bad ka Sorkar Jylla bad ka Sorkar Pdeng halor ka nongrim ba ka Sorkar kam ai laitluid ïa ki nongïalam ban wan ïakren da kaba map ïa ki kam beaiñ kiba la leh da ki nongïalam bad ki dkhot ha ki por ba la leit.
