Shillong, Rymphang 09
U Myntri Rangbah ka Jylla, u Conrad K Sangma u la ong ba lada ka Sorkar Meghalaya kam don kata ka jinglah jong ka (capacity) ban pyndonkam ïa ka pisa ba mang da ka Sorkar Pdeng na ka bynta ki skhim bapher bapher kynthup kiba wan lyngba ka North Eastern Council (NEC), ka Meghalaya kan nym ïoh satia ïa ka bhah kaba la ai tam shuh shuh ïa ka Jylla.
U Myntri Rangbah u la pynpaw ïa kane haba kylli halor ka jingduna ki projek kiba wan na ka North Eastern Council (NEC) bad ka jingmang pisa ka Sorkar Pdeng ïa ka NEC ruh ka duna namarba ka jingmang pisa ka dei katkum ka jinglah ki Jylla ha ka Thaiñ Shatei Lam Mihngi ban pyndonkam ïa ka pisa kaba la mang.
Kumta u Myntri Rangbah u la ong ba khlem da kynnoh ïano-ïano ha kane ka bynta, u sngewdei ban banjur ban kham pynjynjur ruh ïa ki kyndon kiba wan lyngba ka tnat Development of North Eastern Region (DoNER) jong ka Sorkar Pdeng khnang ba ki projek kiba dei ban pyntrei ha ka Thaiñ Shatei Lam Mihngi la ka dei lyngba ka NEC ne kiwei kiwei ki shnat, kan long kaba kham sted.
U la ai nuksa ruh da kaba kdew ba lada don ki projek kiba la dep mynjur ban pyntrei kiba hap ban pynkylla noh na ka daw bym ïahap ka jaka bad ban leh noh da kawei pat ka projek, ka ju shimpor ban ïoh jingmynjur ïa kata ka jingpynbeit haba phah sha ka NEC namar hap ban phah biang sa sha kiwei ki tnat ka Sorkar Pdeng. U la ong ruh ba kane ka shim por ha kaba ki don ki khep ba hap pan jingmut sa na ki riewshemphang bad haba hap ban ïaid lyngba kine ki jnit ki jnat kam long kaba suk ban pynsted ïa ki projek.
“Namarkata, ngin ïohi ba la ka dei ha NEC ne DoNER, bun ki Jylla kim lah ban pyndonkam ïa ka pisa ba la mang namarba ki don kine ki jingeh kiba hap ban ïaid katkum ki kyndon kiba donbynta bun tylli ki tnat,” u la ong haba bynrap biang ba donkam ban peit ïa kane kumba u la dep ai jingmut ruh ha ka jingïalang ka NEC kaba la long dang shen ha Shillong.
U Myntri Rangbah u la ong ba lada dei shisha ba ka Meghalaya kam kot bor ban pyndonkam ïa ka pisa na ka bynta ki skhim bapher bapher, kumno pat ka Jylla ka dang ïoh tam shuh shuh ïa ka mang tyngka kum ïa ka skhim Jal Jeevan Mission kumba T.1300 klur, PMAY bad kumjuh ka jingïoh pisa shuh na ka Sorkar Pdeng kaba tip kum ka ‘Special Assistance on Capital Investment.’
U la ai nuksa ruh ba lada ka mang tyngka ka NEC ka dei T.1900 klur na ka bynta ki Jylla ka Thaiñ Shatei Lam Mihngi, ka Meghalaya pat ka la lah ban pyndonkam ïa ka pisa kaba T.2,000 klur tang ka bhah kaba dei lyngba ka Capital Investment.
Ha kawei pat ka liang, u Myntri Rangbah u la kyntait ïa ka jingkynnoh ka VPP ba ki projek kam pynroi kiba pyntrei ha Jylla ki dei kiba shu shim lut da ka ram.
U la ong ba kito kiba kynnoh ki dei ban kdew tikna kiba kumno kita ki projek kiba shu pyntrei da ka ram ym ban shu kynnoh kyllum.
“Lada ka Jylla ka shim ram na ka bynta ki kam pynroi, ka shim katkum ki kyndon jong ka RBI bad jong ka Sorkar Pdeng kaba shah ïa ka Jylla ban shim katkum u pud,” u la ong. U Myntri Rangbah u la ong ba ym don kano-kano ka jingbakla lada ka Sorkar Jylla ka shim ram na ka bynta ki kam pynroi ha Jylla. U la ai nuksa ba lada ka Sorkar Pdeng ka ai T.1000 klur bad lada ka Jylla ka shim tang T.500 klur, ka Jylla kan duh jingmyntoi namar khlem shim ïa kaei kaba ka Sorkar pdeng ka la bhah.
Namarkata kane ka Sorkar Jylla ka shim katkum ki kyndon kiba ka Sorkar India ka la buh na ka bynta ki kam pynroi ka Jylla. Halor ka jingkynnoh ba shim ram ban maramot ïa ka dam ha Umïam, u Myntri Rangbah u la ong ba ka Sorkar Pdeng ka la mang ïa kane ka jingmang pisa bad ka dei kaba la ai ruh sha ki jylla bapher bapher ha ka ri.
U la ong ba kane ka dei ka sien banyngkong ba ka don ka jingmang pisa ban pynbha ïa ki Dam bad na kane, la mang T.400 klur lyngba ka tnat Jal Shakti ïa ki dam ha Meghalaya bad kam dei tang ïa ka dam Umïam.
