Shillong, Rymphang:
U Myntri Rangbah, Conrad K Sangma, ha ka Sngi Palei u la pyntip ba ka sorkar ka la pynlut palat T. 500 klur ban pynbha ïa ki shlem ai jingpule.
Ïa kane, u Conrad u la kren haba plie ïa ka Academic Block, Hostel na ka bynta ki khynnah kynthei bad shynrang jong ka Williamnagar Government College, Mini Outdoor Stadium, bad ka Entrepreneurship Cell ha Williamnagar, East Garo Hills.
Haba pynpaw ïa ka jingsngewnguh sha baroh kiba la don bynta ban tei ïa katei ka kolej, u Conrad u la ong ba ka sorkar ka la shimti ïa ka kolej naduh u snem 2008, hynrei ym shym la don satia ka jingmang tyngka ban pynbha ïa kane ka shlem ai jinghikai.
“Haba ngi plie ïa kine ki lai tylli ki shlem mynta ka sngi, kiba don hapdeng jong kine ki dei ki khun samla,” la ong u Myntri Rangbah da kaba bynrap ba lyngba ki kpait saiñ kam, ka sorkar ka buh ïa ki samla hakhmat bad ban kyntiew ïa ki.
“Ym dei tang ka pule ka dangle, hynrei dei ban pynbiang ruh ïa ki kam ki jam bad ki lad kamai jakpoh na ka bynta ki samla,” u la bynrap.
Shuh shuh u la ong ba ki nongrit kum ka Williamnagar bad Resubelpara ki dei ban lah ban pynlong ïa ka Meghalaya Games ha ki snem ki ban wan bad u la pynbna ban mang pisa ban shna ïa ka jaka mareh bad ka madan ha Williamnagar Mini Stadium.
Ha kajuh ka por u la ïathuh halor ki projek kiba dang pyntrei ha Williamnagar bad East Garo Hills kum ka jingpynitynnad ïa ka nongrit bad ka jingshna ïa ka Critical Care Unit bad ka jaka kha khyllung kaba don 50 jingthiah bad ka jinglut na ka bynta kine ka long T. 20 klur.
Nalorkata, u Conrad u la ong ba shen, ka Kynhun Myntri kan sa ai jingmynjur ïa ka jingthmu ban kynthup ïa ka Science bad Arts Stream ha ki kolej jong ka sorkar kiba don ha Williamnagar, Baghmara, bad Sohra.
