Jowai, Rymphang 09
Ban teh lakam bad khanglad ïa ki kam be-aiñ ha ka thaiñ khappud ka ri India bad Bangladesh, u District Magistrate ka West Jaiñtia Hills District ha ka 9 tarik Rymphang u la pynmih ïa ka hukum kaba pynjari da ka kyndon 144 CrPC ha khappud ka distrik bad ka Bangladesh.
Ïa kane ka hukum la pynmih hadien ba la ïoh pdiang ïa ka jingujor na ki shipai BSF halor ka jingjyllei jong ka jingkhaïi be-aiñ bad ka jingrung jingmih be-aiñ jong ki briew lyngba ki khappud khamtam ha ka por mynmiet.
Katkum ka hukum, la khang ïa ka leit wan ki briew sha khappud da ka jingthmu ban rung ban mih be-aiñ hapdeng ki artylli ki Ri.
La khang ban ïaid kjat ne ïaid kali naduh ka por 6 baje janmiet haduh ka por 5 baje mynstep ha ka jingjngai ba 5 km na khappud.
Ha kajuh ka por, la khang ban ïalum paidbah palat 5 ngut, ka jingrah ïa ki tiar pynmynsaw, ki maw ki dieng ha ki bynta ha ka jingjngai ba 5 Km na khappud bad ka Bangladesh.
Shuh shuh la khang ïa ka jingkhaïi be-aiñ ïa ki masi, kwai, biri, sikret, slasha bad kiwei-kiwei ki mar. La khang ban pynlong ïa ki ïew ki hat khappud naduh 8:00 baje mynmiet haduh 6:00 baje mynstep ha ka jingjngai kaba 1 km na ki khappud bad ka ri Bangladesh.
Kane ka hukum kan treikam shi syndon tad haduh ba la pynbna da kumwei.
