Nongstoiñ, Rymphang 09
Ka jingïai shah pyndik jong ki paidbah Khasi kiba leit ba wan khamtam ha ka kit ka bah lyngba ka surok Langpih – Kamphaduli, ka la pynlong ïa ka Hynñiewtrep Youth Council, Ri-Muliang Circle ban pynpaw ïa ka jingsngewkhia kaba jur.
Ki nongkitkam ka HYC, Ri-Muliang Circle ha ka jingdonlang ki nongkitkam ka HYC West Khasi Hills ha ka Sngi Thohdieng ki la leit ban aiti ïa ka jingthoh sha u ADC ka West Khasi Hills ban dawa ba un shimkhia bad tuklar lem halor katei ka bynta.
Ki la pynpaw ba ka jingleit ban ujor jong ka HYC sha ki bor distrik ka dei ruh hadien ba ka ju ïohsngew ïa ka jingud jingnam jong ki paidbah halor ka jingïai pyndik jong ki pulit ka Assam ïa ki briew kiba ïaid ba ïeng khamtam kiba kit ïa ki mar rep ban leit die sha ïew kumjuh kiba wan kit ïa ki mar ki mata la ka long kum ki tiar ïing tiar sem ha kaba kine ki pulit Assam ki ai daw da kumne da kumtai bad don ruh ki khep ba ki briew ka Assam kiba kam kum ki pulit khlem ka ‘uniform’ ki ju dawa pisa na ki.
Nalor kane, ki don ruh ki kali kiba shah kem bad shah ujor mukotduma.
Kumta halor kane ka phang, ka HYC ka dawa na ka Sorkar Jylla bad na ka tnad pulit ba ki dei ban shimkhia halor kane ka jingeh ba ki paidbah khappud ki ïakynduh. Ka la kyntu ruh ïa u DC bad SP ka WKH ba kin ïakren bad u DC bad SP jong ka Kamrup, Assam ban lait ka jingmih kino-kino ki jingjia ba sngewsih.
Haba kren sha ki lad pathai khubor hadien ka jingïakynduh ïa u ADC ka WKH, na ka liang jong u samla Distarbor Wanniang, President ka HYC Ri-Muliang Circle u la ïathuh ba ki paidbah na ki thaiñ Langpih haba ki leit ïew leit hat sha Assam ki ju shah pyndik ha lynti ha ki pulit Assam da kaba bat bad kem ïa ki kali ba kit mar kit mata.
