Shillong, Rymphang 09
U Symbud Chief Executive Member ka Khasi Hills Autonomous District Council (KHADC), Bah Pynshngaiñ N Syiem u la ïoh ban pyllait ïa ka jingrwai phangpdeng jong ka Monolith Festival 2024 kaba la long ha ka Sngi Thohdieng ha Conference Hall jong ka KHADC.
Ha kane ka sngi la pynïaid ïa ka jingïalang da u Bah Teiborlang Pathaw uba dei u EM, nangta la ai jingkren da u EM ba dei peit ïa ka tnad art and culture u Bah Victor Ranee, Bah Alan West Kharkongor ha ka jingïadonlang ki MDC, ki ophisar ka KHADC.
Hadien ba la dep pyllait ïa ka jingrwai, u Bah Pynshngaiñ N Syiem u la ïoh ruh ban pyllait ïa ka kali ka ban leit pynbna sha ki paidbah ban wer sha ka Monolith Festival 2024 ka ban long ha ka 22 tarik haduh 24 tarik mynta u bnai ha Khasi Heritage Village kaba don marjan bad ka Lawkyntang Mawphlang. Haba ïakren bad u Bah Pynshngaiñ N Syiem uba dei u U Symbud Chief Executive Member ka KHADC ha ryngkat ka jingïadonlang ki EM, u la pyntip ba kane ka Monolith Festival kaba lai kan kham itynnad namar ki la wanrah da kiwei ki jait shad tynrai bad bam tynrai kumjuh ruh la shna pynbha biang ïa ki ïing trep jong ki hima Khasi kiba la dep shna ha Mawphlang.
U la pyntip ba la dep shna bha ïa ki ïing ki hima ryngkat ka jingïatreilang bad ka tnad shangkai pyrthei ka sorkar jylla. U la ïathuh ba yn phah da ka jingthoh sha ki shnong ba kin ïarap ban pyrta paidbah khnang ban kin ïoh ban ïashim bynta ha ka lympung Hynñiewtrep khnang ba ki paidbah kin ïoh ban shim bynta.
“Ngi la khot na Garo Hill bad Jaiñtia ban buh ki dukan khnang ba ma ki ruh kin ïoh ban ïashim bynta ha kane ka monolith festival” u la ong. Ha kajuh ka por u la pyntip ba ha ka sngi sdang kata ka 22 tarik mynta u bnai yn wan plie da u Bah Prestone Tynsong bad ha ka 24 tarik kaba dei ka sngi pynkut yn wan u Conrad Sangma bad u Bah Paul Lyngdoh uba dei u Myntri ka tnad shangkai pyrthei.
