Shillong, Rymphang:
U Myntri ka tnat Animal Husbandry and Veterinary ka jylla, Bah A.L Hek, u la pyntip ba ka tnat ka la dep ban phah ka jingtyrwa sha ka tnat Pla Tyngka na ka bynta ka jingmang pisa ban ïoh sdang noh ïa ka Health Check Point ha Byrnihat Ri-Bhoi District.
U Myntri u la ïathuh ba hadien ka jingïalang bad ka Synjuk ki Rangbah Shnong Ri-bhoi, kiba la wan ïakynduh ha ka Sngi Palei na ka bynta ban buddien halor ka jingthmu jong ka tnat Animal Husbandry and Veterinary ban pyntreikam noh ïa ka Check Health Point ha Byrnihat, ka tnat ka shong ruh ka jingïalang ban ïakren halor kane.
U Bah Hek u la ïathuh ba ka jingtyrwa mang pisa ba ka tnat Animal Husbandry and Veterinary ka la dep ban phah sha tnat Pla Tyngka ka Sorkar Jylla ka long kaba kot haduh T.4 klur kata ban ïoh sdang pyntrei noh ïa ka Health Check Point.
Shuh shuh u Bah Hek u la ïathuh ba ka tnat ka la mang palat T.4 klur tam hynrei namar ka jingduna pisa, ka tnat ka la mang shwa tang T.1.5 klur ban sdang pyntreikam suki-suki katba ka tnat Pla Tyngka kam pat lah ban mynjur ïa ka jingtyrwa.
U la ong ba u la dep ban wan jurip ïa ka jaka bad ong ruh ba ka jingdon jong ka Health Check Point kan long shisha ka jingmyntoi namar kane ka jaka kan long kum ka jaka ka ban peit bniah ïa ka koit ka khiah jong ki jingri ba wanrah na shabar ka Jylla hashwa ban pynrung sha ka Jylla bad ban bam doh da ki paidbah ka Jylla.
U la pyntip ba ha kane ka jaka yn buh ruh ïa ki doctor na ka tnat Animal Husbandry and Veterinary ba kin eksamin ïa ka koit ka khiah ki masi, blang, syiar ne kiwei kiwei ki jait jingri hashuwa ban pynpoi sha paidbah ka Jylla.
