Shillong, Rymphang 09
U MP ka Trinamool Congress (TMC), u Saket Gokhale ha ka Sngi Thohdieng u la ther tyngeh halor ka mat ba ïadei bad ka ktien kaba u Lat ka Jylla, u Phagu Chauhan un sa kren ha ka Dorbar Mang Tyngka ban wan jong ka Jylla.
“Hashuwa ban sdang ka Dorbar Mang Tyngka jong ka Meghalaya, la pynbna ba u Lat ka Jylla un ai jingkren sha ka ïingdorbar ha ka ‘Hindi’. Ïa kane, la kyrshan da ka BJP hapoh Meghalaya bad u nongïalam ka BJP (hapoh Meghalaya) u la kam bakla ba ka ktien ‘Hindi’ ka dei ka ktien ka ri ne ‘National Language’ bad kumta kan don jingeh aïu,” la ong u Gokhale haba kren ha ka ‘Zero Hour’ hapoh Rajya Sabha.
U Gokhale u la pynpaw ba ka ‘Hindi’ kam dei ka ‘National Language’ bad ka ‘Official Language’ jong ka Meghalaya ka dei ka Phareng bad ka Jylla ha kajuh ka por ka sngew sarong ban don ïa ka lariti ha ka liang ka ktien ka thylliej ba kynthup ruh ïa ki ktien tynrai – Khasi bad Garo.
“Wat hapdeng kiba bun ki jingdawa na ki nongshong shnong ka Jylla kumjuh ka TMC, ka Sorkar Pdeng kam pat kynthup ïa ka Khasi bad Garo ha ka Khyrnit ba 8 ka Riti Synshar ka Ri,” u la ong.
Halor ka jingkwah u Lat ka Jylla ban kren ‘Hindi’ hapoh ïingdorbar ha ka jaka ka Phareng, utei u MP u la ong ba kane kam dei kaei-kaei hynrei ka jingpyntreikam jubor ïa ka ‘Hindi’ bad ka jingpyrshang ban pyntroiñ ïa ka jingriewspah ka ktien ka thylliej jong ka Meghalaya.
Kumjuh, haba pynkynmaw ïa ka jingmynjur ka Sorkar ïa 3 tylli ki aiñ pynngat kyndon na bynta ki kam be-aiñ, u Gokhale u la ong ba na ka daw kaba i pher, ïa kitei ki aiñ, la ai da ki kyrteng kyllaiñ ha ka ‘Hindi’.
Haba kdew ba shabar jong ka Thaiñ Shatei ka ri, ka ‘Hindi’ kam dei ka ktien pdeng jong ki klur ngut ki nong India, utei u nongmihkhmat u la ong ba dei na kane ka daw ba ka Riti Synshar ka Ri ka la jied ban pynneh ïa ka Phareng kum ka ‘Official Language’ lem bad ka ‘Hindi’.
“Ka jingpyrshang jong ka Sorkar ba mynta ban pyntreikam jubor ïa ka ‘Hindi’ kaba la kren tang da kumba 46% jong ki briew ha kiwei-kiwei ki bynta jong ka ri ka long ka jinglehraiñ. Ym don burom shuh ïa ki ktien tynrai bad man ki aiñ thymmai, man la ki kyrteng thymmai kaba kane ka Sorkar ka ai ka dei ha ka ‘Hindi’ na katto-katne ki daw,” u la ong.
“Hato ki ktien jong ka Thaiñ Sepngi, Thaiñ Shathie bad Thaiñ Mihngi kim long kongsan hapoh kane ka ri. Hato ki ktien tynrai kim don jingmut,” u la buh jingkylli.
Shuh shuh utei u MP u la kyrpad ba dei ban pyndonkam ïa ka ktien ‘Phareng’ na bynta ka kam jong ka sorkar ne ‘Government Business’ ha baroh kawei ka ri kynthup ha ki Jylla bym kren ‘Hindi’.
“Haba ka Riti Synshar ka Ri ka kdew ïa ka Phareng bad ‘Hindi’ kum ki ‘Official Language’, ka jingptyntreikam jubor ïa ka ‘Hindi’ ha ka jaka ka Phareng bad ki ktien tynrai da ka Sorkar ka long ka jingbym burom bad jingkyntait na bynta ki Jylla ki bym kren Hindi,” u la ong.
