Shillong, Rymphang 09
Ka Meghalaya High Court ha ka Sngi Thohdieng ka la aipor haduh ban da kut u bnai ba mynta na ka bynta ban kit ïa u dewïong uba don 1.5 lak Metric Ton na ki jaka lum thup ha East Jaiñtia Hills sha ki shlem ba la khmih da ka Coal India Limited na ka bynta ban die lilam lym kumta, ka sorkar kan sa shimti noh ïa une u dewïong bad lilam da ka Coal India Limited.
Haba shong bishar halor ka mukotduma kaba ïadei bad ka jingtih bad jingkit dewïong be-aiñ, ka ïingbishar ka la kdew sha ka kaiphod ba 19 jong u Justice (Retired) BP Katakey ha kaba ïadei bad ka jingdon jong u dewïong u bym pat lah ban kit haduh mynta ha ki distrik.
Ha South Garo Hills, West Khasi Hills bad South West Khasi Hills, ka paw ba ka jingai ïa ki ‘transit pass’ bad ka jingkit ïa u dewïong uba la dep lum jingkheiñ yn pyndep hashwa ban kut u bnai mynta.
Hynrei ka High Court ka la pynpaw ïa ka jingsngewkhia ha kaba ïadei bad u dewïong ha East Jaiñtia Hills. Ha ka kaiphod la pynpaw ba u dewïong ba la dep lum jingkheiñ u don 10,04,587.502 MT, bad na une, la dep ban ai ïa ka ‘transit pass’ ban kit ïa u dewïong uba don 8.54 MT na ki jaka ba la lum thup sha ki shlem jong ka Coal India Limited.
Na ka bynta u dewïong uba dang sah, kata, kumba 1.5 lak MT, ym pat shym ai satia ïa ki ‘transit pass’ wat la ki dang don ki jaka ha ki shlem lum thup ha East Jaiñtia Hills. Ka daw ba ym pat shym la lah ban ai ïa ki ‘transit pass’ ka long namar ki trai dewïong kim wan sha u Deputy Commissioner ban pan ïa kine ki kot watla la dep ban pynmih ïa ki byrta na ka por sha ka por.
Na ka liang ka High Court ka la ai hukum ba ïa utei u dewïong uba dang sah, kata, 1.5 lak MT, yn hap ban kit sha ki shlem ba la mang da ka Coal India Limited hashwa ban kut u bnai ba mynta. Lada ym lah ban leh kumta, ïa une u dewïong baroh yn sa kurup noh da ka sorkar bad hadien kata, yn sa lilam hapoh shi bnai da ka Coal India Limited.
Ka High Court ka la ong ruh ba ka pisa kaba mih na ka jinglilam ïa une u dewïong yn thep sha ka pla jong ka sorkar jylla hadien ba la siew sha ka Coal India Limited bad sha ka Meghalaya Environment Protection and Restoration Fund.
Ïa kane, ka High Court ka la ong ba ki bor ba dei khmih kin hap ban ai ïa ka jingtip ïar sha baroh.
Ha kajuh ka por, ka High Court ka la ong ba ha katei ka kaiphod ba 19 jong u Justice Katakey, la kdew ba ka sorkar ka dang bud ïa ki jingbthah ha kaba ïadei bad ka jingpynïaid ïa ki kot ki sla na ka bynta ban ïoh tih dewïong da kaba pyndonkam ïa ki kor ki bor bad da ka jingstad saïan, jingkhang noh ïa ki krem dewïong kiba don, jingbuh ïa ki khyrdop ban buddien ïa ka jingpynïaid ïa ki marpoh khyndew, bad ka jingïoh jong ki karkhana ïa u dewïong ban pynïaid ïa ki kam jong ki.
