Shillong, Rymphang 09
Ka Hynñiewtrep Youth Council (HYC) ka la ong ba ka North Eastern Indira Gandhi Regional Institute of Health & Medical Sciences (NEIGRIHMS) ka la rai ban pynsangeh noh shuwa ïa ka eksamin Nursing Officer Recruitment Common Eligibility Test (NORCET) naba ka wanrah ïa ka jingduhnong ïa ki samla ka Jylla.
“Ha kine ki bnai bad ki snem ba la dep, ka NEIGRIHMS ka la pynlong ïa ka eksamin ban thung kam ïa ki ophisar nos lyngba ka NORCET…ka seng ka dawa ba ka NEIGRIHMS ka dei ban pynsangeh shuwa ïa kane namar ka la wanrah ka jingduhnong khamtam ïa ki khun samla ka jaidbynriew,” la ong u President ka HYC, Bah Roy Kupar Synrem haba kren sha ki lad pathai khubor hadien ka jingïakynduh bad u Director ka NEIGRIHMS, Prof. (Dr.) Nalin Mehta.
U la ïathuh ruh ba na ki 222 tylli ki kam kaba ka NEIGRIHMS ka la khot na bynta ban thung kum ki ophisar nos, 201 tylli ki dei na bynta ki shynrang bad 21 ïa ki kynthei bad na kine ki 21, 14 ki dei napoh ka Jylla.
Ha kajuh ka por, u Bah Synrem u la ong ba ka seng ka dawa ruh na ka NEIGRIHMS ba ka dei ban pyntreikam ïa ka rukom thung kam kaba 80% la 20% kumba leh ka AIIMS – 80% na bynta ki kynthei bad 20% ïa ki shynrang.
Halor kane, ka seng ka la ong ba u Director u la kohnguh ban pynsangeh shuwa ïa kane ka eksamin lane ban ïaid shakhmat bad kano-kano ka jingthung kam na bynta ki ophisar nos kat bym pat lah pynbeit ïa kane ka jingbakla.
Na ka liang u Director u la pynsngew ruh sha ka seng ba un sa thoh sha ka tnad ka koit ka khiah ka Sorkar Pdeng ba ka NEIGRIHMS kan ym thung kam shuh na bynta ki nos lyngba ka NORCET.
Halor ka mat ba ïadei bad ki ‘Outsourcing Agency’, u President u la ong ba u Director u la kular ba lada don kiba kum kita ki ‘agency’ ki ban wan, ki ban trei kin dei beit kiba napoh ka Jylla.
Kumjuh, haba ïadei bad ka jingdawa na bynta 80% ka jingthung kam ïa ki trai Jylla ha ka Group B bad C, u la ïathuh ba u Director ka NEIGRIHMS u la ong ba kumba ka long mynta, ka NEIGRIHMS ka bud ïa ka ‘Office Memorandum’ ba la pynmih da ka Sorkar Pdeng, kaba long 44% ïa ki ST.
Haba kdew ba ka NEIGRIHMS ka don ha Shillong bad kumba 80% na ki nongsumar ki dei napoh ka Jylla bad 20% na ki Jylla ka Thaiñ Shatei Lam Mihngi, utei u nongïalam u la ong ba haba phai sha ka kam nos, ka seng ka dawa ba ki briew kiba wan trei ha kane ka jaka kin dei kiba sngewthuh ïa ka ktien ka thylliej.
“Ka seng ka la pynpaw ba kam sngewtynnad haba ïadei bad ka jingwan jong ki briew kiba tang ban ïakren ruh ym ïa pei. Kumba ka long, na ka liang ka seng ryngkat u Director kin sa thoh sha ka tnad ba dei khmih ka Sorkar Pdeng halor ki briew kiba wan trei hangne ki bym lah ban sngewthuh ïa ka ktien,” u la ong.
Shuh shuh u Bah Synrem u la bynrap ba kito kiba ‘pass’ lyngba ka NORCET kim dei kiba don ïa ka ‘Practical Experience’ bad bun ki shu ‘pass’ da kaba thoh ïa ka eksam bad ynda la wan ha NEIGRIHMS, kane ka jaka ka long pynban ka jaka ai jinghikai ïa ki.
“Ngi la kren da kaba shai ïa u Director ba nangne shakhmat lada ki wanrah ïa ka jingthung kam ïa ki nos, dei ban buh ïa kawei ka kyndon – kiba thep kam ki dei ban pyndep ïa ka BSc. Nursing bad kiba la don ha ka kam ym duna ïa ka 2 snem,” u la ong.
