Shillong, Rymphang 11
Ka Committee kaba la thaw da ka Meghalaya High Court ka la ai jingmut ba baroh ki thliew ba tih dewïong kiba la shu ieh kumto bad kiba dang treikam dei ban tap bad pyndap noh shisyndon ha kylleng ka Jylla.
Ïa kane la ai jingmut da ka Committee kaba marwei jong u Justice (retd) BP Katakey ha ka kaiphod kaba arphew jong u.
Ka kaiphod ka ong ba ki par kiba don naduh kiba la ieh kumto bad ki par kiba dang long ban treikam dei ban khang lut da kaba pyndap noh ïa ki thliew khnang ban lait duh ka jingim briew bad jong ki mrad kumjuh, khamtam eh ka jingbteng ban lait ki um jaboh kiba mih na krem dewïong.
Shuh shuh u Katakey u la kdew ha ka kaiphod bad ai jingmut ruh ba namarba ka shimpor kat ban tap lut ïa ki thliew kiba la don naduh mynshwa dei ban ker noh khnang ban ïada na kano kano ka jingjia ïa ki briew bad ki jingri jingdup.
Ka tnat Mining & Geology Department ruh ka la pyntip sha ka Committee haba ïadei bad jingshah ïa ka kaiphod sha ka Sorkar Jylla na ka bynta ka jingdonkam ban khang noh ïa ki thliew tih dewïong da ka Central Mine Plan Design Institute (CMPDI). Ha kawei pat ka liang, kane ka Committee jong u Katakey ka la ong ba ïa u dewïong uba dang sah uba la dep ai jingkheiñ bad pyntikna, dei ban pyndep noh ban lilam lut da ka Coal India Limited hapoh ka 31 tarik Lber, 2024 namar baroh shikatta ym shym la lah ban pyndep na ka daw bym pat lah ban pynpoi ïa u dewïong sha ki jaka ba pyllang ïa u dewïong ban pynïaid ïa ka jinglilam.
