Shillong, Rymphang 11 (UNI)
U Justice S. Vaidyanathan ha ka Sngi U Blei u la bam smai kum u Chief Justice bathymmai ka ïingbishar ka Jylla.
U Lat ka Jylla, u Phagu Chauhan u la pyntian smai ïa u Justice S. Vaidyanathan kum u Chief Justice bathymmai ha ka jingïalang kaba la long ha Raj Bhavan.
U Justice H. S. Thangkhiew u la long kum u Acting Chief Justice jong ka ïingbishar ka Jylla hadien ba u Chief Justice Sanjib Banerjee u la shongthait na ka kam ha u bnai Naiwieng jong u snem ba la dep.
U Symbud Myntri Rangbah ka Jylla, u Bah Sniawbhalang Dhar, Myntri ka tnad aiñ, Dr. M. Ampareen Lyngdoh, Myntri ka tnad SAD, Bah A.L. Hek, Justice H.S. Thangkhiew, Justice Wanlura Diengdoh, Justice Biswadeep Bhattacharjee, Chief Secretary, Bah D.P. Wahlang lem bad kiwei-kiwei ki heh ki haiñ ki la ïadonlang ha kane ka jingïalang pyntian smai.
U Myntri Rangbah ka Jylla, u Conrad K. Sangma, uba leit jingleit shabar ka Jylla ha ka jingthoh ha ka rynsan lad pathai ‘X’ u la ai khublei ïa u Chief Justice bathymmai.
“Nga ai khublei ïa u Justice S. Vaidyanathan uba la bam smai kum u Chief Justice ka ïingbishar ka Meghalaya. Ngi pdiang sngewbha ïa u sha Meghalaya,” la thoh u Sangma ha ‘X’.
