Tura, Rymphang 11
U MDC ka Tura bad nongïalam ka BJP, u Bernard Marak ha ka Sngi U Blei u la thoh sha u Myntri ka tnad pule-puthi ka Sorkar Jylla, u Rakkam A. Sangma halor ki jingeh ba ki khynnah skul ha ka thaiñ jong u lem bad kiwei-kiwei ki bynta jong ka Jylla ki ïakynduh.
Ha kajuh ka por, utei u nongmihkhmat u la kyrpad ruh ïa ka jingtuklar ba mardor jong u Myntri halor katei ka mat.
“Nga la wan jngoh ïa ka konstitwensi jong phi ha u taïew ba la dep bad nga la ïoh jingtip na ki paidbah ba kiba bun na ki skul Sorkar ki don ha ka jinglong-jingman kaba i sangsot. Kiba bun ki skul ki treikam khlem ka tnum. Kam don ka jingbiang haba phai sha ka jingpynkhuid ïa ki jaboh-jabaiñ ne ka umbam-umdih kaba biang ïa ki khynnah. Ki skul kim don jingkhang, ‘blackboard’ ne ki ben bad ha kiba bun ki por, ki blang ki pynlong ïing ïa ki skul. Ki khynnah ba ha thaiñ jong phi ki la ud la nam ïa ki jingeh ba ki mad khamtam ha ka por slap namar ki jingkieng doi-doi kiba long ka lad pynïasoh, ki la shah kit lut ha ka jingshlei um ha u snem 2022. Ym shym la maramot ïa ki jingkieng haduh mynta, ha kawei ka liang kaba la buh jingeh shi kat dei ïa ki khynnah jong ka thaiñ ha ka por slap,” la ong u Bernard ha ka jingthoh.
U Bernard u la kam ruh ba u khaw ba la pynbiang sha ki khynnah lyngba ka ‘PM Poshan Midday Meal’ um long uba biang ha ki katto-katne ki skul bad u la ong ba ka long ka mat kaba sngewkhia.
“Nga kwah ban kyrpad ïa phi ban peitngor bad leh eiei ban kyntiew ïa ki jingdonkam na bynta ki khynnah kumjuh ki nonghikai. Nga kyrpad ruh ïa phi ban siew biang por ïa ki nonghikai. Kane kan pynmyntoi ïa ki khynnah skul jong ka Jylla bad ki skul Sorkar kin kiew ha ka kyrdan jong ki,” u la bynrap.
Halor ka mat ba ïadei bad ka jingsahteng ka baibam jong ki khynnah, u MDC u la kyrpad ïa u Rakkam ban thaw da ka komiti bad shimkhia noh kloi halor kane ka mat.
