Jowai, Rymphang 11
Uwei u rangbah u la kynnoh ba ki shipai BSF ha ka thaiñ Lakroh ki la patrong jubor bad byrngem siat pynïap ïa u.
La ïathuh ba une u rangbah u dei u ophisar In-charge ka tnad Veterinary Dispensary, Muktapur, u Dr. Seiboklang Buam na ka shnong Muktapur.
Kane ka jingjia ka la jia ha ka 11 tarik Rymphang ha ka por 12 baje mynsngi ha ka surok Muktapur-Jaliakhola, kaba hap hapoh ka BSF, BOP Hawai Tilla, West Jaiñtia Hills District.
Une u rangbah u la kam ba u ju ïatreilang bad ki shipai BSF man ka por da don kino-kino ki jingjia, pynban haba u thmu ban leit khwai, ki shipai BSF kiba lap ïa u bad tohkit kumba u dei u nongrung tuh ne u nong Bangladesh.
Une u rangbah u la kynnoh ruh ba ki shipai ki la knieh ïa ka ‘mobile’ jong u bad byrngem ban tan ïa u sha Zero Point bad byrngem siat ïap ruh ïa u.
Shuh shuh une u rangbah u la kynnoh ruh ba ki shipai ki la byrngem ruh ban pynlaw lyngkhuit ïa u bad phah panmap da kaba ktah ïa sla kjat.
Halor kane ka jingjia, ki nongshong shnong kane ka shnong ki la pynpaw ïa ka jingsngewkhia kaba jur halor ka jingleh heh bad pyndik ki shipai ïa ka leit ka wan u paidbah bad ktah ïa ka burom ka ijot jong ki.
