Shillong, Rymphang 11
Ki shikurim kiba dei ki Missionary ne ki nongïalap ïa ka ktien jong U Blei na ri Norway kaba hap ha dewbah Europe wat la kim shym la sah shuh sha Bangladesh hynrei haba ki wan teng-teng sha Bangladesh lada don ka Jingïaseng Pres-bytery ki dang nang beit ban kren ïa ka ktien Khasi.
Kine ki shikurim ki dei kiba la tip kyrteng kum u Gaute Rasmussen bad ka kurim ka Solvor Rasmussen. Kine ki la wan kyrpang ha ka Jing-ïaseng Presbytery sha Nohksiar jong ka Sri-mongol Borlekha Presby-tery kaba 51 kaba hap ha Sylhet Presbyterian Synod, Bangladesh kaba la sdang naduh ka 9 tarik Rymphang bad kut ha ka 11 tarik Rymphang 2024 bad kin hap ban leit phai noh sha Norway ynda la kut ka jingïaseng.
Kaba sngewlyngngoh ïa ki riewngeit Khristan haba ki ïoh sngew ïa kine ki shikurim wat la ki dei na Norway hynrei ki kren da ka Khasi lada dei ha ïingmane ne lada dei ha jaka ba shongkai ruh namar ka Solvor Rasmussen kaba ïoh bynta ban pule bad duwai ka la pule ïa ka ktien jong U Blei bad duwai ruh ha ka ktien Khasi.
U Gaute Rasmussen u la ïathuh ba u la wan ïuhkjat nyngkong ha Bangladesh ha u snem 1979 ha Dhaka ban ïoh jinghikai nyngkong ïa ka ktien Bengalee. Hadien kata un sa leit sha Srimogol ban ïalap ïa ka ktien U Blei bad ki Khasi ha ka Balang Presbyterian.
U la ïathuh ba hadien ba u la trei bad ka Balang Presbyterian ha Bangladesh u la nang ban kren Khasi bad ban ïalap ïa ka ktien U Blei sha ki riewngeit da ka Khasi.
Shuh shuh u la ïathuh ba tang kumba 10 snem tam eiei haba u ïalap ïa ka ktien jong U Blei bad ki Khasi, u la hap ban leit phai noh sha ri lajong sha Norway. Ka daw halor kane ka dei namar u hap ban pynlut ïa ka por ban phah skul ïa saw ngut ki khun sha ri lajong.
“Wat la nga la leit phai sha Norway bad la ka kurim hynrei lada don jingïaseng Presbytery ki Khasi ha Bangladesh nga ju wan beit man u snem lait noh ha u snem 2020 haba ka wan ka khlam covid-19 nga khlem ïoh wan namar ba la khang ïa baroh kawei ka pyrthei” u la ong.
U la ïathuh haba u don sha Norway u ju kynmaw beit ïa ki Khasi ha Bangladesh. Dei na kata ka daw u ju wan jngoh shisien shisnem sha Bangladesh ban ïoh don bynta ha ki jingïaseng.
“Haba nga sah sha Norway nga dang kynmaw beit ban kren Khasi lada nga wan sha Bangladesh” u la ong.
La ïohi ruh ba ka Mem Solvor Rasmussen haba leit sha ka jingïaseng ka la riam da ka jaiñsem dhara kumba long lem ki longkmie Khasi.
