Shillong, Rymphang 11
Ka jingpynkhreh ban siang rong noh shen ïa ki surok shnong ha Lynshing, Mawkynrew C&RD Block ka la wanrah ka jingkmen ïa ki nongshong shnong kiba la ai ruh ka jingpyrto bad pynpaw ka jingsngewnguh ïa u MLA ka Mawkynrew, u Bah Banteidor Lyngdoh.
Kane ka dei ruh ka jingurlong bad jingangnud ki nongshong shnong kaba la sahteng da ki phew phew snem. Ïa kine ki surok shnong yn pynbha bad siang rong ha ka mang tyngka kaba long 1 klur tyngka.
Ban pynïaid ïa kane ka kam shakhmat, u MLA ha ryngkat ki ophisar ka PWD (Roads) ByPass Division ba kynthup ïa u Bah S Lytep, Executive Engineer ki la hiar ban jurip ha ka 7 tarik mynta u bnai kum ka jingpynkhreh ban siang rong ïa katei surok ha ka jingïadonlang ki nongïalam shnong ryngkat ki ‘riew rangbah lem bad ki nongïalam ka Balang Presbyterian ha katei ka shnong.
Kane ka jingshna ïa ki surok ka dei ruh shwa ban wan ka jingïaseng Presbytery ha katei ka shnong ha kaba ha katei ka sngi la leit jngoh ruh ïa ka madan ban pynlong ïa ka jingïaseng. Hadien katei ka jingjurip ka la don ruh ka jingïalang ha ïing shnong ha kaba la ïakren shibun ki bynta kiba dei shaphang ka roi ka kiew kynthup ruh ïa katei ka surok.
U Bah Banteidor haba kren ha ka jingïalang u la ong, “Ka jingkyntiew ïa ka roi pat ka dei ka kam kaba ha khmat ynda la dep ka ilekshon bad ngi hap ban ïatreilang ban kyntiew ïa ka thaiñ. Ka jingurlong kane ka surok ka dei lyngba ka jingïatreilang kaba dei pat ka lynti sha ka roi ka par bad ka ïoh ka kot ki nongshong shnong “.
