Shillong, Rymphang 11
Ki kompani kiba thmu ban ïashim bynta ha ka ‘tender’ na ka bynta ban pynïaid ïa ka 108 Ambulance ki hap ban pyni lypa ïa ka bhah kaba ki don bynta lada pynïaid da kaba don bynta lang lane ‘joint venture’ bad kiwei pat ha ka jingai jingshakri.
Ka tyllong khubor ka ïathuh ba ha ka ‘tender’ ka ban sa khot biang, la buh lang ïa kawei ka kyndon haba ïadei bad ka ‘joint venture’ lane ka jingdon bynta lang ban pynïaid ïa ka 108 Ambulance.
“Kum ka nuksa, lada ar tylli ki kompani ki wanlang ban ïadon bynta ban pynïaid 108 Ambulance, ka kompani kaba lamkhmat ka dei ban pyni lypa ïa ka bhah ba ka don bynta kham bun kumba 51 na ka 100 (palat 50%),” la ong ka tyllong khubor.
La ong ba ha ka kot ‘tender’ kaba mynshwa, ym shym la kdew tikna katno ka bhah ka dei ban don lypa lada ki kompani ki don bynta ban shimti lang ban pynïaid ïa ka 108 Ambulance.
Kumta hadien ba ka don ka jingbym shai ha kane ka bynta, ka tnat aiñ ka Sorkar Jylla ka la pyni ba ki kompani kiba ïashim bynta ha ka ‘tender’ ki dei ban ïathuh lypa ïa ka bhah kaba ki don lada ki shimti ban pynïaid da kaba shu don bynta lang (joint venture) ha kaba ka kompani kaba lamkhmat ban pynïaid ka hap ban pyni ïa ka bhah kaba kham bun.
Lah ban pynkynmaw ba ka Sorkar Jylla ka la rai ban khot ‘tender’ biang ban jied ïa ka kompani ban pynïaid ïa ka 108 Ambulance namarba kim pat biang ki kot ‘tender’ kiba la phah da ki kompani kiba ïashim bynta ha ka ‘tender’ kaba la pynmih lyngba ka National Health Mission.
Ha ka ‘tender’ kaba mynshwa, ki la don 7 tylli ki kompani kiba ïashim bynta kiba kynthup ïa ka Emergent Global Services, Kubera Solutions Pvt Ltd, Pashupatinath Distributors Pvt Ltd (PDPL), Ziquitza Healthcare Pvt Ltd, Medulance Healthcare Pvt Ltd, Jai Ambe Roadline Pvt Ltd bad Kria Healthcare Pvt Ltd.
Ha ka jingshisha, ka tnat ka koit ka khiah ka kwah ban pyndep noh ïa kane ka kam ha u Lber 2024 khnang ban ïoh ïa ka kompani kaba thymmai ka ban shimti ban ai jingshakri ha ka liang ka 108 Ambulance.
