Tura, Rymphang 11
Shi kynhun ki seng na Rilum Garo ha ka Sngi U Blei ki la ujor sha u Myntri Rangbah, u Conrad K Sangma, ha kaba ki la kynnoh ba kiba bun tylli ki shnong hapoh ka thaiñ Tikrikilla ha West Garo Hills ki khlem pat ïoh bording wat la pyndait ïa ki Meter naduh saw snem mynshwa bad ki longïing longsem ki ïoh beit thik-thik ïa ki ‘Bill’ ban pyni ba ki pyndonkam bording.
Kitei ki seng ki kynthup ïa ka AAPE, Civil Society A’chik Welfare Organization (CSAWO) bad Constitutional Rights’ Forum (CRF).
Ha ka jingujor, ki la ong ba ki nongshong shnong kum ka Dabongjora, Dabanggre, Bolsaldamgre, Daigre bad Diganpara (Mewalkam) kiba hap hapoh ka Tikrikilla Block ki la ïoh pdiang ïa ki ‘Bill’ watla ka bording kam pat poi satia sha kine ki shnong.
Hynrei ki la kdew ba ki don tang katto-katne tylli ki longïing ha ka shnong Dabangjora bad Dabanggre kiba la ïoh bording. Tangba ki la kdew ba ka jingkheiñ ïa ka ‘Bill’ ba pyndonkam bording ha Dabanggre ka long tang kumba shisien ha ka shi snem bad namarkata, ka bai thang bording ka ju poi da ki lak tyngka kaba buh jingeh ïa ki longïing ba kin siew.
Ha kajuh ka por ki la kren shai ruh ba ki ïing ha Bolsaldamgre, Daigre bad Dinganpara kim don bording satia wat la dep ban pyndait lut ïa ki tiar ki tar mynta la saw snem eiei.
Haba kynthoh ba ka jingbym don bording ka buh jingeh ïa ki nongshong shnong, kitei ki seng ki la kyntu ïa ka sorkar ba kan peit halor kane ka bynta.
Ïa ka jingujor la ai ruh sha u Myntri ka tnat bording, u AT Mondal, MP ka Tura, ka Agatha K Sangma, u MLA ka thaiñ, u Jimmy D Sangma, u MLA ka Raksamgre, u Limison D Sangma, u Deputy Commissioner bad kiwei pat ki heh sorkar.
