Tura, Rymphang 11
Ka jingangnud jong ki nongshong shong ka Ri-lum Garo na bynta ka ‘Tech Park’ ha sor Tura kan sa urlong noh shen.
Ka tnad Development of the North Eastern Region (DoNER) ka Sorkar Pdeng ka la mang T.126.94 klur ha ka Sngi Palei hapoh jong ka skhim Prime Minister’s Development Initiative for North East Region (PM-DevINE) na bynta katei ka ‘Tech Park’.
Ka ‘Tura Tech Park’ ka dei u mawmer ba dang shen haba phai sha ka jingïaid lynti ka Meghalaya ban long ka jaka pdeng jong ki kor ka juk stad teknoliji ka Thaiñ Shatei Lam Mihngi.
Kawei na ki projek banyngkong ba la sdang da ka Sorkar Jylla hadien ba ka la wan ha ka bor synshar ka long ka ‘Shillong Tech Park’.
Ha ka jingïalang plie ïa katei ka jaka kaba hap ruh ha ka sngi rakhe dap 50 snem ka Jylla – u Myntri Rangbah, u Conrad K. Sangma u la pynpaw ka jingkyrmen ba ki khun samla ba don sap ka Jylla kin ym donkam shuh ban mih na la ïing na bynta ban wad kam wad jam.
Haba pynshisha ïa kane, ka Shillong Tech Park ka la thaw 1,500 tylli (direct) bad 5,000 tylli (indirect) ki kam ki jam na bynta ki nongshong shnong ka Jylla kiba la pyntbit ha ka liang ka IT tang hapoh shi snem.
Kum ka jingai mynsiem halor kane ka jingjop, ka Sorkar ka la pynbna ban mih shakhmat na bynta ka kylla ba-ar haba ïadei bad kum kane ka ‘Park’ ha New Shillong Township ha u snem ba la dep.
Ha kajuh ka por, la khmih lynti ba kan thaw sa kumba 3,000 tylli (direct) bad 9,000 tylli (indirect) ki kam. Ban shim kabu shuh-shuh haba ïadei bad kane ka bynta, ki IT bad IT-enbled-Services (ITeS) ki la jan ïoh pdiang ïa ka ‘Industry Status’ ha ka ‘Meghalaya Industrial & Investment Promotion Policy’ ba dang shen, ha kawei ka liang, ka ban tyrwa ïa ki jingïohnong sha ki nongbei tyngka ha kane ka tnad.
Kane ka Sorkar ka dang pynbeit ïa ka IT&ITeS Policy bathymmai ka ban pyndonkam ïa ki teknoliji ha juk stad mynta kum ka AI, ‘Blockchain’ bad ‘Internet of Things’ na bynta ka jingmyntoi ka Jylla. Ka ‘Tura Tech Park’ ka dei ka jingbteng jong kane ka jingpyrshang.
Haba shim ïa ka jingkren u Myntri Rangbah uba la dap da ka jingkmen, u la ong, “Ngam shym la artatien wat khyndiat ruh ba ka ‘Shillong Tech Park’ kan synran ïa ka juk thymmai na bynta ka Meghalaya. Hynrei nga kwah ban kner ïa kane ka jingkiew jong ka IT ha ka rukom kaba ïa biang ryntih ha kylleng ka Jylla. Ka buit ban wanrah ïa ka ‘Tura Tech Park’ la pynwandur na kata ka jingangnud.”
