Shillong, Rymphang 11
Ka Bharatiya Janata Party (BJP) ha ka Sngi U Blei ka la pyllait ïa ki kyrteng jong 14 ngut ki kyrtong ki ban ïakhun ïa ka ilekshon MP sha Rajya Sabha ka ban long ha ka 27 tarik Rym-phang.
Ka jingjied ïa kitei 14 ngut ka long namar ka jingshongthait noh jong kumba 58 ngut ki MP Rajya Sabha hadien ba ka samoi treikam ba hynriew snem ka la poi sha kaba kut.
Napdeng kine 58 ngut ki MP, kin don ki ban shongthait noh mynta bad don ki ban shongthait ha ka taïew banyngkong u Jymmang.
Ki MP ki ban shongthait ki don 28 ngut na ka BJP, 11 ngut na ka Congress, 4 na ka Trinamool Congress, 4 na ka Bharat Rashtra Samithi, mar 4 ngut na ka Biju Janata Dal, Rashtriya Janata Dal bad Janata Dal (United), bad mar uwei na ka YSRCP, Shiv Sena, NCP, Telugu Desam Party, bad ka Sikkim Democratic Front.
Kine ki MP ban shongthait ki kynthup ïa u Myntri Rangbahduh barim, u Dr Manmohan Singh, u President rangbah ka BJP, u JP Nadda, lem bad ki Myntri Sorkar Pdeng kum u Mansukh Mandaviya bad Parshottam Rupala na Gujarat, Dharmendra Pradhan bad L Murugan na Madhya Pradesh, bad u Narayan Rane na Maharashtra.
Hynrei na ka liang ka BJP ka khlem pynpaw ba yn jied biang ïa kine ki Myntri Sorkar Pdeng sha ka Rajya Sabha. Tangba ki khubor ki pynpaw ba kine ki lah ban ïakhun syndon da ka ilekshon MP Lok Sabha ka ban sa long shen.
Ki dkhot ka BJP kiba la shah jied ban ïakhun sha ka Rajya Sabha ki long u RPN Singh na Uttar Pradesh, uba dei u nongïalam barim ka Congress bad uba la pynïasoh sha ka BJP ha u snem 2022.
Nalor jong u Singh, kiwei pat kiba la shah jied ban ïakhun ïa ka ilekshon MP Rajya Sabha na Uttar Pradesh ki long u Sudhanshu Trivedi, Chaudhary Tejveer Singh, ka Sadhna Singh, Amarpal Maurya, ka Sangita Balwant bad u Navin Jain.
Lait noh u Sudhanshu Trivedi, kitei kiba la shah jied ban ïakhun ïa ka ilekshon MP na Uttar Pradesh ki dei kiba dang thymmai. Ka seng ka khlem jied shuh ïa u Anil Jain, Anil Agrawal bad u G V L Narasimha Rao ban ïakhun biang kum ki MP Rajya Sabha.
Ha Bihar, ka BJP kaba ïatreilang bad ka seng JD (United) ha ka sorkar jylla, ka la jied ïa u Dharmsheela Gupta bad u Bhim Singh. Ka kyrteng kaba jah nangne ka dei jong u Sushil Kumar Modi uba long u nongïalam ka BJP uba la paw bha ha Bihar.
Ha Chhattisgarh, ka BJP ka la jied ïa u Raja Devendra Pratap Singh bad un mih bujli ha ka jaka jong ka Saroj Pandey.
Ha Haryana, ka seng kan pynïakhun da u President barim ka BJP, u Subhash Barala, katba ha Karnataka, kan pynïeng da u Narayana Krishanasa Bhandage.
Na Uttarakhand, ka BJP kan pynïakhun da u Mahendra Bhatt katba na West Bengal kan pynïeng da u Samik Bhattacharya.
Ka BJP ka khlem pat pynbna ïa ki kyrtong jong ka na Gujarat, Madhya Pradesh bad Maharashtra.
Ha kawei pat ka liang, ka Trinamool Congress ka la pynbna ïa ki saw ngut ki kyrtong ki ban ïakhun ïa ka ilekshon Rajya Sabha bad kine ki long ka Sagarika Ghosh, kaba dei ka nongthoh khubor, ka Sushmita Dev, kaba la long teng ka MP, ka Mamata Bala Thakur bad u Nadimul Haque.
