New Delhi, Rymphang 11
Ki bor sorkar ki la khang lut ïa ki jaka khappud hapdeng ka Haryana bad ka Punjab da kaba pyndonkam da ki jingker ba la shna da ka dewbilat bad ka jingbuh da ki prek kiba heh ha surok namar ka jingthmu jong ki nongrep ban ïakhih naduh ka 13 tarik Rymphang.
Nalorkata, ha ka Sngi U Blei, ki pulit ka nongbah Delhi ki la buh da ki jingpyrkhing ha baroh ki jaka khappud bad ka Uttar Pradesh ban ïada na kino-kino ki jingjia ba sngewsih ha ka por ba ki nongrep kin wan tur sha ka nongbah jong ka Ri.
Kane ka jingpynkhreh jong ki nongrep ban wan tur sha Delhi ka pynkynmaw ïa ka jingïakhih ka jong ki ha u snem 2020 ha kaba da ki hajar ngut ki nongrep na Punjab bad Ambala ki la ïalum ha Shambhu bad ki la tur pyrshah ïa ki jingker ba la pynap ban ïoh rung sha Delhi.
Kato ka jingïakhih ki nongrep ka la neh kumba shi snem eiei ban pyrshah ïa ki lai tylli ki aiñ kiba la wanrah da ka Sorkar Pdeng. Ki nongrep ki la sangeh ban ïakhih ha u snem 2021 hadien ba ka Sorkar Pdeng ka la pyndam noh ïa kito ki aiñ.
Mynta ka kynti, nalor ka jingpyrkhing ha surok, ka sorkar Haryana ka la ai hukum ban khang noh shwa ïa ka ‘Mobile Internet’ bad ka jingphah bun tylli ki jingthoh lyngba ka SMS ha ki hynñiew tylli ki distrik – Ambala, Kurukshetra, Kaithal, Jind, Hisar, Fatehabad bad Sirsa.
Kine ki jingpyrkhing ki la wan ha ka por ba ki nongrep ki la pynkhreh ïa la ki traktor ban wan tur sha Delhi.
Kumta la khmih lynti ba palat 200 tylli ki kynhun jong ki nongrep kin ïashim bynta ha ka jingïaid bad jingtur sha Delhi naduh ka 13 tarik Rymphang, bad ki jingdawa jong ki, ki kynthup ïa ka jingwanrah ïa ka aiñ halor ka Minimum Support Price (MSP) ïa ki mar rep bad kiwei.
Ha ka Sngi Palei, lai ngut ki Myntri ka Sorkar Pdeng ki la pynlong ïa ki jingïakren kiba sani bha bad ki nongïalam jong ki kynhun ki nongrep.
Ki nongïalam jong kynhun ki nongrep ki la ong ba kitei ki Myntri Sorkar Pdeng ki la kular ba kin sa pynlong biang ïa ka jingïakren ha ka sien kaba ar. Hynrei kine ki kynhun ki la kren shai ba kin leit tur beit sha Delhi.
Na ka liang ka Sorkar Pdeng ka la khot biang ïa ki nongïalam jong ki kynhun nongrep ban ïakren ha ka Lah Sngi U Blei (Rymphang 12 tarik).
Nalorkata, ki nongrep ki la dawa ban pyntreikam ïa ki jingai jingmut jong ka Commission ba la khlieh da u Dr MS Swaminathan, jingai bai bam tymmen, ban weng noh ïa ki ram ki shah jong ki nongrep, jingweng noh ïa ki jingmudui pyrshah ïa ki nongrep bad kiwei.
Ha kawei pat ka liang, ka sorkar Haryana ka la pynkylla ïa ki artylli ki ‘Stadium’ kiba heh ban long kum ki along (jail) ba shipor.
Kitei ki ‘stadium’ ki kynthup ïa ka Chaudhary Dalbir Singh Indoor Stadium ha Sirsa, bad ka Guru Gobind Singh Stadium ha Dabwali. Ha kine ki ‘stadium’, yn set ïa ki nongrep lada ki thmu ban ïaid shakhmat bad ka jingïakhih ban tur sha Delhi.
Ka Samyukta Kisan Morcha bad kiba bun kiwei pat ki kynhun nongrep na Uttar Pradesh, Haryana, bad Punjab ki la khot ban pynlong da katei ka jingïakhih ban dawa na ka sorkar ba kan pyntreikam ïa ki jingdawa jong ki.
“Balei ka sorkar ka tieng? Ka la buh da ki jingker kiba heh ha surok. Hato kane ka dei ka Ri synshar paidbah?” la ong u nongïalam ka SKM, u Jagjit Singh Dallewal, da kaba bynrap ba lada jia eiei, ka sorkar Haryana kan hap shim jingkitkhlieh. Na ka liang ki bor pulit ha Delhi ki la pynkhlaiñ ïa ka jingbuh da ki jingker ha surok ba kynthup ka jingpynap da ki prek. Ki pulit ki la khang ruh ïa ka jingwan rung ki traktor, bos, kali paidbah, kali shimet, bad kiwei kiba kit ïa ki nongïakhih na Uttar Pradesh sha ka nongbah jong ka Ri.
