Jhabua (MP), Rymphang 11 (UNI)
Haba ther tyngeh ïa ka Congress, u Myntri Rangbahduh ka ri, u Narendra Modi ha ka Sngi U Blei u la kynnoh ba ka seng ka shah “ker kdong ha ka ahor jong ki pop lajong, bad katta ka nang ïaksaid ban lait, katta kan nang ngam.”
Haba ai jingkren ha ka Janjatiya Sammelan ha ka jaka shong ba bun ki ‘riewlum, utei u nongïalam u la ong, “Ka Congress, kam don jingsngew ïa ki shnong jong phi, hynrei ïa la ki jong ki ïing paki dulan, ka bunkam ha ki kam pynjulor bad pynïaphiah, hynrei ka ri kan ym ai lad ïa kiba kum kine ki kam ban jop.”
Haba pynpaw ka jingkyrmen ba ka National Democratic Alliance (NDA) kan sa jop palat 400 ngut ki nongmihkhmat ha kane ilekshon ban wan, u la ong ba tang ka Bharatiya Janata Party (BJP) marwei kan sa poi sha ka thong ha palat 370 tylli ki konstitwensi.
“Nga kyrpad ïa phi ban ïashim bynta shit rhem ha ki jaka thep ‘vote’ ban pynsaphriang ïa ki jingtip jong ki jingjop jong phi. Ki nongïalam ka liang pyrshah ki la sakhi ïa ka jingshisha ha ka ilekshon sha ka ïingdorbar thawaiñ jong ka Madhya Pradesh. Ka jingshisha, kane ka jinglong u paidbah ha man la ki bynta jong ka ri. Katba nga dang tyrwa ïa ka jinglehniam ha ka Thaiñ Shathie, nga la ïohi ïa ki longkmie, ki hynmen, khynnah bad samla kiba la wan da ki hajar ban theh ïa ki jingkyrkhu ha nga. Ngam shym la lah mutdur,” la ong u Modi.
Ha Madhya Pradesh, ka Sorkar ‘double-engine’ ka treikam ha ka jingsted kaba arshah bad ka jingainam na bynta kane ka leit sha u paidbah, u la ong da kaba bynrap ba kiba bun ki ong ba u Modi un sa sdang ïa ka jingïalap ilekshon sha ka Lok Sabha na Jhabua, hynrei, “Nga ong ba u Modi um shym la wan ban pan jingkyrshan. U la wan kum u shakri bad ka jingsngewnguh ïa ki paidbah. Nga pyntikna ba ngin minot miet la bad sngi na bynta jong phi.”
Ha ki por ba la leit, ka Madhya Pradesh ka la mad ïa ki juk ba dum jong ka Congress, u la kynnoh da kaba bynrap ba ïa ka Jylla la ñiew napdeng ki BiMaRU.
“Ka dawbah ka dei namar ka jinglong jong ka Congress kaba dap da ka jingisih na bynta ki shnong, u duk u suk bad ki jaka ‘riewlum. Kane ka seng kam ju pyrkhat na bynta ka roi ka par bad ka burom jong ki Adivasi ïa kaba ka kheiñ tang na bynta ban ïoh khroh ‘vote’,” la ban jur u Modi.
“Ka Congress ka la plie tang 100 tylli ki Eklavya Model Residential School ha kiba bun ki snem ba ka la ïoh lad ban wanrah ïa ka jingmanbha. Ka la khang ïa ka lad kamai na ki mar napoh khlaw bad kam shym la leh eiei haba ïadei bad ka ‘Sickle-Cell Anaemia’. Ka ïeng shaniah kynroh haba la rah ïa ka ‘riewlum sha ka kyrdan ophis ba halor tam jong ka Riti Synshar. Ki jingkynthoh ka Congress pyrshah ïa nga ki syrtap iwei-hadien-iwei,” u la ong.
