Shillong, Rymphang 11
Namarba jan baroh ki skul kin sa plie noh ha kane ka taïew mynta, ka tnad pulit pynïaid kali kan pynkhlaiñ shuh-shuh ïa ka rukom treikam ha ka liang ka jingdon ki nongtrei (pulit) khnang ba kan ym don kano-kano ka jingdkoh ha ka ïaid ka ïeng jong ki kali khamtam ha ki kynta long skul.
“Ynda la long skul, ka rukom ïaid kali khamtam ha Laitumkhrah – na Dhankheti shaduh Don Bosco ter-ter kan long biang kumjuh,” la ong u S.P. (Traffic), u K. Prasad.
U la ong ruh ba yn buh shuh ïa ki pulit pynïaid kali (nalor kiba la don lypa) ha ki jaka ba don ki skul khnang ban peitngor ïa ka ïaid ka ïeng jong ki kali ha kine ki jaka.
“Ngin pyrkhing ruh ïa ka ïaid ka ïeng jong ki kali heh kum ki trok ha ki jaka sor ha ki kynta long skul,” u la ong.
Ha kajuh ka por, u SP u la pynpaw ka jingkyrmen ba ka jingdon jong ki bos skul ‘STEMS’ lehse kan sa ïarap ha ka ban pynduna ïa ka jingkhapngiah ha ki surok.
Kumban shu kdew hangne, ki kmie ki kpa kin hap ban pynrung kyrteng shuwa ïa la ki khun hashuwa ban ïoh ïa ki jingmyntoi jong kine ki bos.
Haba phai sha ka jingshngaiñ, ha kine ki bos la pyndait ruh ïa ki CCTV bad ki nongtrei ki long kiba la pyntbit nalor kiwei-kiwei.
Na ka liang u Prasad, u la ïathuh ba ki pulit ka tnad kin ïarap haba ïadei bad ki jaka jingpynïeng ïa kine ki bos, ka ïaid ka ïeng jong ki khnang ban lait sahkut, bad ban poi sha ki jaka ba la thmu ha ka por kaba biang.
Haba kylli, u la ong ba ka tnad kan peitngor bad leh ïa kaba donkam lada lap ïa kino-kino ki khynnah skul kiba ñiah kali ne ar-shaka khlem ka laisen.
“Ki khynnah skul kim dei ban ñiah kali ne ar-shaka lada kim don laisen,” u la ong.
Shuh shuh u la bynrap ba kano-kano ka jingpynkheiñ kyndon kan khring ïa ka jingpynshitom katkum ka aiñ ym tang ïa ki nongñiah hynrei wat ïa ki kmie ki kpa kiba shah bad ai lad ïa la ki khun ban ñiah kali ne ar-shaka.
Halor ka jingdon jong ki pulit pynïaid kali ha sor Shillong, u SP u la ïathuh ba kumba ka long mynta, ki don kumba 450 ngut ba kynthup ïa 200 ngut ki ‘Homeguard’.
“Kine kin treikam ha ki lai kylla – mynstep, mynsngi bad mynmiet,” u la ong.
