Nongstoiñ, Rymphang 12
Ka Hynñiewtrep Youths’ Council (HYC) Nongstoiñ Circle ha ka Lah Sngi U Blei ka la leit ban ïakynduh ïa u Branch Manager (BM) jong ka State Bank of India (SBI) Nongstoiñ Branch ban ïakren halor ki jingeh ba ki khynnah skul bad ki ‘riew paidbah ki ïakynduh haba leit donkam sha katei ka shlem kynshew pisa.
Ki nongïalam ka HYC ki la pynpaw ba ha katei ka jingleit ïakynduh, ki la kyntu ïa u BM ka SBI ban thawlad kumno ban pynsted ïa ka jingpyndep ha kaba ïadei bad ka jingplie ïa ki Account hapoh ka bank khamtam ïa ki samla pule kiba hap ban aplai ïa ka baibam (Scholarship).
Shuh shuh na ka liang ka HYC ka la kyntu ruh ïa u BM ba un ïakren sha ki bor ba halor jong ka SBI ba kin pynbun ïa ki jaka sei pisa lyngba ki kor ATM khnang ban pynsuk ïa ki paidbah nongsei pisa.
Ym tang katta, ka la kyntu ruh ha kajuh ka por ba dei ban pyntikna ba ki kor (updating machine) ki dei ban treikam bha khnang ba kan ym ktah than ïa ki paidbah.
