Shillong, Rymphang 12
Ka Khasi Students’ Union (KSU) ka la ther tyngeh ïa ka tnad shipai Border Security Force (BSF) namar ka jingleh donbor jong ka bad buh jingkylli halor ka jingdon ki shipai ka tnad ha ki jaka khappud ka Jylla.
“Ngi sngew ba ki BSF ki dei ban ai jingïada ha ki jaka khappud, hynrei ngi ïohi ba ki leh donbor pynban ïa ki briew jong ngi,” la ong u General Secretary ka KSU, samla Donald V. Thabah.
Haba pynkynmaw ïa kawei na ki jingjia ha u snem ba la dep, u samla Thabah u la ong ba ki shipai BSF (ha u snem ba la dep) ki la siat ïa uwei u nongñiah trok ha Mawshun bad haba ïadei bad kane, na ka liang ka tnad kam shym la pynbna paidbah eiei halor katei ka jingjia haduh mynta.
Kumjuh, halor ki jingjia shah kynnoh pynïap ki Khasi ha khappud ha ki runar na Bangladesh, u General Secretary u la ong, “Hato ka BSF ka lah ban ïada ïa u pud bad ai jingïada ïa ki briew jong ngi? Ki briew jong ngi ki mad jingeh ym tang na ki BSF hynrei na ki briew na shiliang khappud.”
U la ong ruh ba hato ka BSF kan shim mo ka sienjam ban ïakren bad ka tnad shipai na shiliang (BGB) halor ki jingjia kiba ju jia ha ki jaka khappud.
Haba ban biang ba ka jingdon jong ki shipai BSF ka long ban ïada ïa ki khappud, u la ong, “Lada ki briew ba nabar ki wan rung shapoh ban pynïap, tuh bad lute, te kaei ka jingmut ban don ïa ki BSF. Ki leh donbor pynban ïa ki briew jong ngi.”
“Kaei ka kamram jong ka BSF – hato ka long ban ïarap ïa ki runar na shiliang ne ban ïada ne ban leh donbor ïa ki briew jong ngi,” la buh jingkylli utei u samla nongïalam.
U la bynrap ba lada ki shipai ka tnad BSF kim lah ban kitkhlieh ne ai jingïada ïa ki nongshong shnong Khasi ba shong ba sah ha ki khappud, kan bha shi kat dei ïa ka tnad ban pynkha noh da ka ‘Battalion’ kaba kyrpang ka ban pynrung tang ïa ki Khasi kiba sngewthuh bad kiba lah ban ïada ïa ki khappud.
Kum ban shu kdew hangne, uwei u rangbah u la kynnoh ba ki shipai BSF ha ka thaiñ Lakroh ki la patrong jubor bad byrngem siat pynïap ïa u.
Utei u rangbah u dei u ophisar In-charge ka tnad Veterinary-Dispensary, Muktapur, u Dr. Seiboklang Buam na ka shnong Muktapur.
Katei ka jingjia ka la jia ha ka 11 tarik Rymphang ha ka por 12 baje mynsngi ha ka surok Muktapur-Jaliakhola, kaba hap hapoh ka BSF, BOP Hawai Tilla, West Jaiñtia Hills District.
Utei u rangbah u la kam ba u ju ïatreilang bad ki shipai BSF man ka por haba don kino-kino ki jingjia, pynban haba u thmu ban leit khwai, ki shipai BSF kiba lap ïa u, ki la tohkit kumba u dei u nongrung tuh ne u nong Bangladesh.
