Shillong, Rymphang 12
U Myntri barim ka tnat Arts and Culture ka Sorkar Jylla, u Bah Sanbor Shullai u la pynpaw ka jingkmen halor ka jinglah ban plie noh ïa u motdur uba shirynïeng jong u Tirot Sing Syiem ha nongbah Dhaka ha Bangladesh khamtam eh namarba ki jingangnud ki la urlong kumba u la maitphang ha ka por ba u dang long kum u Myntri Sorkar.
U Bah Sanbor uba dei u MLA ka BJP na South Shillong konstitwensi, u la pynkynmaw ïa ka sienjam kaba ma u ha ka por ba u dang long u Myntri ka tnat Arts and Culture u la shim na ka bynta ban ïakren ha Delhi bad ka tnat kaba khmih ïa ka kam bar ri jong ka India na ka bynta ban tei ïa u motdur uba shirynïeng jong u Tirot Sing ha Dhaka kaba dei ka jaka kaba u la shah set patok bad khlad.
U Bah Sanbor u la pynkynmaw ruh ïa ki por kiba la leit ha kaba u la shim ki lad ki lynti ban tei mot sahnam ïa ki lai ngut ki riewkhraw kiba kynthup ïa u Tirot Sing, Kiang Nangbah bad Pa Togan Sangma ha phyllaw ka State Central Library.
U Bah Sanbor u la kren ruh shaphang ka jingjynsur mynsiem jong u ban buh ïa u mot jong u Kiang Nangbah ha Jowai kumjuh ruh ïa u mot u Tirot Sing.
Na ka liang u Bah Sanbor u la pynpaw ruh ba u sngewhun ba u la lah ban pynurlong ïa u motdur ba shirynïeng jong u Tirot Sing ha Dhaka khamtam namarba hadien 52 snem la lah ban leh ïa kane ban pynsahnam ïa ki riewkhraw. U la pynkynmaw ruh ba u la dep sdang ruh ha ki snem ba mynshwa na Kench’s Trace bad ha ka por ba u long u Myntri Sorkar la lah ban tei mot ïa ki lai ngut ki riewkhraw u Tirot Sing, Kiang Nangbah bad Pa Togan Sangma.
Haba kylli la ma u ruh u shah khot ne em ban leit lang sha Bangladesh na ka bynta ka jingplie ïa u motdur jong u Tirot Sing, u Bah Sanbor u la ong ba um shym la ïoh jingtip tikna bad u shu ïoh jingtip pateng ba kan don ka jingplie ïa u motdur u Tirot Sing ha Dhaka ha ka 16 tarik mynta u Rymphang, 2024.
U Bah Sanbor u la bynrap ba kam pher lada um shah khot ban leit lang sha Bangladesh namar kiba leit ban plie, ka long kumba ki la leit na ka bynta jong u.
