New Delhi, Rymphang 12
Ka Delhi Zonal Unit jong ka Narcotics Control Bureau (NCB), kaba dei ka tnat jong ka Sorkar India kaba ïakhun pyrshah ïa ki drok, ha ka Lah Sngi U Blei ka la pynbna ba ka la lah ban pyndakhol ïa ka kynhun ki nongkhaïi drok kaba treikam ha kylleng ka pyrthei (International Drug Cartel) bad ka la ïoh kem ïa khyndai ngut ki briew ba kynthup ïa lai ngut ki nong Mexico kiba donkti ban shet ïa ki drok.
Ha u kyrwoh khubor, ka NCB ka la ong ba katei ka kynhun ka la treikam ha National Capital Region, Rajasthan, Punjab, bad Dubai, bad ki dkhot jong ka kynhun ki dei ki nong India, Mexico, Canada bad Bilat.
Ha ka jingtohkit, ka NCB ka la ong ba la lap ïa kawei ka jaka shet ïa ki drok kaba treikam na Ludhiana, Punjab.
Ha ka jingkhynra, ka NCB ka la ïoh ban kurup 15.106 kilo ki drok Methamphetamine (Ice), 9 kilo u Pseudoephedrine, bad shibun ki dawai ba pyndonkam ban khleh ïa u drok.
Ka jingïoh kem ïa kitei khyndai ngut bad ka jinglap ïa katei ka jaka shet drok ka dei hadien ba ha ka 17 tarik Kyllalyngkot, ka NCB Delhi Zonal Unit ka la ïoh ban kurup 2.946 kilo u drok Methamphetamine na DHL.
Hadien kata, ki la ïoh kem ïa arngut kiba donkti ban kit ïa ki drok na Jaipur. Ka NCB ka la ong ba kine kiba la shah kem ki la phla ba ki la ïoh ïa u drok Methamphetamine na uwei u nong Delhi. Nangne, uta u nong Delhi u la shah kem na Rohini bad la ïoh ruh ban kurup na ka ïing sah jong u kumba 12.16 kilo u drok Methamphetamine.
Shuh shuh ka NCB ka la ong ba ha ka jingtohkit, la shem ba une u drok ba la kurup na Delhi u dei uba la wan na Punjab. Da ka jingtohkit kaba bniah, la lap ba une u drok u dei uba la wan na Ludhiana bad kiwei ki distrik jong ka Punjab.
La ong ruh ba ïa utei u drok la shna ha kawei ka shlem kaba don ha Ludhiana bad la pynkit da ki briew na ki jaka bapher-bapher kiba don ha Punjab kum ka Amritsar, Fagwada, bad Mohali.
Namarkata, ka NCB ka la leit ban khynra ha Ludhiana, Mohali bad Jalandhar. Ha ka jingkhynra ha Ludhiana ha ka 29 tarik Kyllalyngkot, arngut ki nong India ki la shah kem bad la lap ruh ïa 4 kilo u drok Pseudoephedrine.
Na ka jingai jingtip jong kitei arngut kiba la shah kem, ka NCB ka la khynra sa ha kawei ka kudam ba shu wah ha Ludhiana bad hangne la lap pynban ba ka don da ka shlem kaba shna ïa u drok Methamphetamine.
Ha ka jingkhynra, la lap ïa kiba bun ki dawai ba la pyndonkam ban shna ïa u drok Methamphetamine bad la kurup ruh ïa 5 kilo u drok Pseudoephedrine. Na kane ka jaka, la ïoh kem ruh ïa lai ngut ki nong Mexico kiba la pynithuh ïalade ba ki donkti ban shna ïa ki drok.
Nalorkata, ha ka jingtohkit, la lap ba kitei ki lai ngut ki nong Mexico ki la wan sha India ha u Naiwieng 2023 da ka jingbthah jong ki briew kiba pynïaid ïa ki na Mexico bad Bilat. Ki la shong la sah ha Ludhiana bad ki la ïoh ïa ki dawai dashin bad kiwei ki mar ki mata ban shna drok na ki nong India kiba la shah kem.
Ka NCB ka la ïathuh ruh ba ha ka jingtohkit ha Delhi, sa uwei u briew u la shah kem na Ferozpur, Punjab. La suba ba uwei u nongïasaid aiñ na Mohali u don bynta bad kine ki briew bad ïa mynta, u dang don hapdeng ka jingphet rieh.
Na ka liang ka NCB Delhi Zonal Unit ka dang bteng ïa ka jingtohkit ban lap sa ïa kiwei pat kiba donkti ha kane ka kam be-aiñ.
