Shillong, Rymphang 12
U Myntri Rangbah ka Assam, u Himanta Biswa Sarma, ha ka Lah Sngi U Blei u la ban jur halor ka jingkwah ban teh lakam ïa ki kam ïalap niam lane ‘evangelism’ ha ka jylla baroh kawei.
Ïa kane, u Himanta u la kren sha ki lad pathai khubor ha Assam haba jubab halor ki jingkylli kiba ïadei bad ka jingthmu ka sorkar Assam ban pyntreikam ïa ka aiñ Uniform Civil Code (UCC) bad ka jingkheiñ be-aiñ ïa ka jingïoh bun ngut ki kurim lane ‘polygamy’.
Halor ka UCC bad ka jingkhang ïa ka jingïoh bun ngut ki kurim, u Himanta u la ong ba ka sorkar jylla ka dang pynïaid shakhmat ïa ka kam kumno ban pynïasoh ïa kine ki artylli ki mat. U la ong ba ïa kane, la ïakren ruh ha ka Kynhun Myntri.
“Ka Kynhun Myntri jong ka Assam ka la dep ban ïakren halor ka UCC bad ka Polygamy Ban Bill. Kham mynshwa, ngi la kham pynleit jingmut ha ka ban wanrah da ka aiñ ban khang ïa ka jingïoh bun ngut ki kurim, hynrei mynta ngi dang ïakren kumno ban pyntreikam lang hajuh ïa kine ki aiñ (UCC bad jingkhang ïa ka jingïoh bun ngut ki kurim) khnang ba kan don beit tang kawei ka aiñ kaba khlaiñ,” la ong u Myntri Rangbah.
U la ong ba kan don da ka ‘Expert Committee’ ka ban peit halor kane ka jingbuh tang da kawei ka aiñ. Kane ka long hadien ba ka jylla Uttarakhand ka la ai jingmynjur ïa ka aiñ ban pyntreikam ïa ka UCC.
Haba ban jur ïa ka jingkwah ban teh lakam ïa ki kam ïalap niam ha Assam, u Himanta u la kren halor ka aiñ rew ba ka sorkar jylla ka la ai jingmynjur ïa kaba la ai kyrteng “The Assam Healing (Prevention of Evil) Practices Bill, 2024.”
Kane ka aiñ rew ka khang ïa ka jingai jingkoit da kaba shu leh jadu lane kata ka ‘magic healing’. Lada lap ïa kiba donkti ha kine ki kam, kin shah kem bad shah set patok ha ryngkat ka jingsiew ïa ka kuna.
Lah ruh ban kdew ba katei ka aiñ rew ka pynleit jingmut ïa ki rukom ai jingsumar kiba ïadei bad ka jingkyllut, jingbym lait kren, jingbym ïohi ki khmat, jingduna ha ki dkhot met bad kiwei.
“Ngi kwah ban teh lakam ïa ki kam ïalap niam, bad ka jingwanrah ïa katei ka aiñ rew (“The Assam Healing (Prevention of Evil) Practices Bill, 2024″) ka long kaba donkam. Kane ka long ka mat kaba kham kongsan namar la pyndonkam ïa ka ban pynkylla niam ïa ki jaitbynriew kiba dei ki riewlum. Ngin sa wanrah ïa kane ka aiñ rew namar ngi ngeit ba dei ban pynneh ïa ka jinglong kumjuh ha kaba ïadei bad ka niam,” u la ong.
U la ong ba kiba dei ki Muslim, kin neh ki Muslim, kiba dei ki Khristan, kin neh kum ki Khristan bad kiba dei ki Hindu, kin neh kum ki Hindu khnang ba kan don ka jingïabiang ha ka jylla.
