Shillong, Rymphang 12
Ka Dorbar Shnong Mawïongrim ryngkat ka jingsynran lang ki pulit ka Mawlai ha ka step Lah Sngi U Blei ki la leit ban phah khang noh ïa katto-katne ki dukan kiba la sdang ban mih biang harud surok ha Mawïongrim View Point.
Katkum ka jingtip, la ong ba ha kane ka step, ki la don katto-katne ki nongshong dukan madan kiba la hiar biang ban sdang ïa ka jingdie dukan harud jong ka surok. La ong ruh ba kane ka jingplie biang ïa ki dukan die madan la leh khlem da ïoh jingbit na ka Dorbar Shnong bad ruh la kynnoh ba ka dei ka jingpynkheiñ ïa ka hukum jong ka ïingkashari Meghalaya High Court.
La ïoh ban sakhi ba ki la don haduh kumba 5 ne 6 tylli ki dukan die madan ba kynthup ïa ki nongdie sha, ki dukan die jingbam khutia, ki soh ki pai, tiar shna kti bad kiwei kiwei ki la mih biang ha kane ka jaka jngoh kai ïa ka pung Umïam.
Kumta na ka liang jong ki nongïalam shnong mar ïoh jingtip halor kane ka jingmih biang ki dukan madan ha kane ka jaka, ki la kyndit bad mar-mar hapoh ka jingïalam u Rangbah Shnong ki la hiar sha kane ka jaka ban phah khang bad phah lum noh ïa ki mar ki mata namar ba na ka liang ka dorbar shnong ka la khang pyrshah ban buh dukan ha kane ka jaka namar ka jingpynjaboh bad jingmih ki kynrum-kynram na ka por sha ka por.
Ha kaba nyngkong, wat la na ka liang u Rangbah Shnong Bah SL Nongpiur lem bad ki nongkitkam shnong ki la tuklar bad phah khang, hynrei kine ki nongshong dukan madan ki la pyneh beit triang haduh ba la mih ka jingïapyni nia kaba jur bha hapdeng jong ki.
Ha kane ka jingïapyni nia, la wan poi noh ki pulit na ka thanat Mawlai ha kaba ki la lah ban tehlakam ïa kano-kano ka huri-hura kaba lah ban mih na ka jingkhang pyrshah jong ka Dorbar Shnong.
U Rangbah Shnong ka Mawïongrim Bah Sorbar L Nongpiur, u la pyntip ba ka Dorbar Shnong ka la khang pyrshah ban pynlong jaka ïew ne shong die jingdie ha kane ka jaka jngohkai kaba ïatip kum ka Ryndangbriew Viewpoint.
“Ki nongdie madan ki la wanrah ïa ka jingjaboh bad jingjakhlia ha kane ka jaka bad wat ka ïingkashari Meghalaya High Court ka la pynmih ïa ka hukum ba ym dei ban shah buh dukan ne die jingdie ha kane ka jaka,” u la ong.
U Rangbah Shnong u la ong, “Naduh ki por mynshwa ka Dorbar Shnong ka la shem ba jyllei ki kam jaboh nalor ka jingjakhlia ha kane ka jaka bad dei namar kane, ka la pyrkhing ïa ka ïadie ïathied bad khang syndon ïa ki dukan bad kiba die madan hadien ba mih ka hukum na ka Meghalaya High Court.”
Shuh shuh u la pyntip ba kine ki briew kiba la wan sdang biang ka jingdie dukan, kim shym la kynjoh ktien ne pyntip ïa ka Dorbar Shnong bad ki la shu wan shong die jingdie khlem ka jingïoh jingbit.
U la ong ba lada ki nongshong shnong ki wan mih sha ka Dorbar Shnong, kum u Rangbah Shnong u kloi ban shim ki lad lynti ban wad jaka shawei ban ailad ïa ki ban shong die jingdie.
