Shillong, Rymphang 12
Ka Meghalaya Veterinary Services Association (MVSA) kaba dei ka synjuk ki doktor bad nongtrei ka tnat ri jingri, ka la pynlong ïa ka jingïalang kaba kyrkieh halor ka jingleh donbor ki shipai BSF ïa uwei u doktor, uba dei u ophisar ba peit ïa ka dispensary ha Muktapur, u Dr. seiboklang Buam.
Kum ban pynkynmaw, u Dr. Seiboklang Buam u la mih shakhmat ban ïathuh ba ki shipai BSF ha ka thaiñ Lakroh, ki la byrngem siat pynïap ia u.
Kane ka jingjia ka la jia ha ka 11 tarik Rymphang ha ka surok Muktapur Jaliakhola, kaba hap hapoh ka Hawai Tilla border outpost.
Une u rangbah u la ong ba u ju ïatreilang bad ki shipai BSF man ka por da don kino-kino ki jingjia, pynban haba u thmu ban leit khwai hynnin ka sngi, ki shipai BSF ki la tohkit ïa u kumba u dei u nongrung tuh ne u nong Bangladesh.
Shuh shuh, une u rangbah u la ong ruh ba ki shipai ki la byrngem ban pynlaw lyngkhuit ïa u bad phah panmap da kaba ktah ïa ki sla kjat.
Halor kane, na ka liang ka MVSA ka la pynrem jur ïa ki shipai BSF halor ka jingleh khlemakor ka jong ki, ha kaba la ong ba ka kynhun ka la shim ïa ki sienjam ban leh da kaba tyngeh halor katei ka jingjia.
Ka MVSA ka la pyntip ruh ba kan hap ban ïakren halor katei ka jingjia kaba la ktah ïa uwei na ki dkhot ka synjuk jong ki.
Ka MVSA ka la dawa ruh na ki bor ba dei khmih ïa ka Border Security Force ba ki dei ban panmap bad ban pynthikna ba kum kitei ki jait jingjia kin ym jia shuh nangne shakhmat.
