Shillong, Rymphang 12
Ka United Democratic Party (UDP) ka la pynrem jur halor ka jingleh donbor jong ki shipai BSF ïa u ophisar jong ka Sorkar Meghalaya, uba trei ha ka tnat Veterinary bad Animal Husbandry, Muktapur kaba hap ha ka Block Amlarem ha ka 11 tarik Rymphang.
Ha ka kyrwoh khubor ba la pyllait da u General Secretary ka UDP, Dr Jemino Mawthoh u la ong, ka UDP ka sngew bynñiaw jur hadien ka jingsaphriang ka khubor ba la mih ha ki rynsan social media, ba u ophisar u la shah leh donbor, shah tohkit bad la phah ïa u ban law ïa ki jaiñ phong bad ruh ba ki shipai BSF ki la byrngem ban siat ïa u ha Zero Point kaba dei ha khappud jong ka Ri India bad Bangladesh.
U Dr Jemino u la ong, kane ka jingleh jong ki shipai BSF kiba dei ban ïada bad ai ïa ka jingshngaiñ ïa ki briew kiba sah ha ki thaiñ khappud, ka la buh ïa kane ka kynhun ha ka jinglehraiñ. Kane ka jingleh khlemakor jong ki shipai BSF ka long kaei-kaei kaba ym lah ban pdiang satia, u la ong.
Ka UDP kan ym shim sting ïa kane ka kam bad kan thoh sha u Director General ka BSF bad ka BSF Vigilance Department ban tohkit halor kane ka jingjia ban ruh ban pynshitom ïa kito kiba donkti kiba leh donbor bad pynkhlemraiñ ïa kat u ophisar jong ka tnat sorkar jong ka jylla. Ha ka jingshisha, kum kine ki jingjia la dei ban kiar khnang ba kiba shong ba sah ha ki thaiñ khappud kin don ka jingsngew shngaiñ.
