Shillong, Rymphang 12
Ka Sorkar Jylla ka la pynsngew lypa sha ka Sorkar Pdeng ba ka Jylla kam pat dei ban duh ïa ka bhah ban leit pule doktor ïa ki samla na kane ka Jylla wat ynda ka Jylla ka la sdang ïa ka jaka pule doktor ha Shillong.
La ong ba ka Sorkar MDA ka shimkhia ban ïoh sdang ïa ka jaka pule doktor ha Shillong da kaba pyndonkam ïa ki jaka sumar kiba la don lypa ha Shillong. Na ka bynta kane yn pynlut kumba T.100 klur ban tei ïa ki katto katne tylli ki ïing kiba donkam na ka bynta kane ka jingthmu.
Kumba ka long mynta, ka Jylla ka dang pynkhreh ban pynbit pynbiang ïa ki jingdonkam ban sdang ïa ka jaka pule doktor ha Shillong da kaba pyndonkam ïa ka Shillong Civil Hospital bad Ganesh Das Government Hospital, Lawmali.
Ka Sorkar Jylla ka la pynkhreh ban plie ïa ka jaka pule doktor ha Shillong kaba 50 ngut kum ka jingsdang.
La ong ba ka jaka kaba don ha Pasteur Institute, Lawmali yn sa pyndonkam ban shna ïa ka jaka pynlong klas bad ruh ka jaka sah kiba leit pule doktor.
Shuh shuh ka Sorkar Jylla lyngba ka tnat ka koit ka khiah hapoh ka jingpeit ka Kong Ampareen Lyngdoh kum ka Myntri, kan sa jied ïa ki doktor ki ban long ki nonghikai bad hashwa ba kin long ki nonghikai ki hap pyntbit shwa shisnem ïa ka jingpule kum ki Senior Residency.
Haduh mynta, ka Jylla ka shaniah ha ki jaka pule doktor kiba don shabar Jylla ban phah ïa ki samla ban leit pule doktor. Man la u snem, ym duna ïa ka 80 ngut haduh 90 ngut ki samla kiba ka Jylla ka phah ban leit pule doktor shabar Jylla.
Kumta, lada ka Jylla ka lah ban sdang noh ïa ka jaka pule doktor ha Shillong kan long ka jingmyntoi shikatdei ei ïa ki samla wat lada yn shim shwa tang 50 ngut kum ka jingsdang.
