Shillong, Rymphang 12
Ka Myntri ka tnad ka koit khiah jong ka Sorkar Jylla, ka Dr. Mazel Ampareen Lyngdoh ka la ong ba ki paidbah sa tang lada ki la ïoh jingshitom kaba kham jur kin sa wan mih sha ki jaka ai jingsumar ban wad bad kylli bniah shaphang ki card Meghalaya Health Insurance Scheme (MHIS).
Haba kren sha ki lad pathai khubor ha ka Lah Sngi U Blei hadien ba la wai ka prokram Meghalaya Cancer Conclave 2024 ha kaba ïadei bad ka jingduna jong ki briew ban pynïasoh ïa ka MHIS Card bad ka Aadhaar, ka Myntri ka la ong ba ka jaitbynriew jong ngi ka bun bha ïa ka jingbym don jingngeit bad kim don jingngeit ha ka Adhaar. Kumta ka long kaba donkam ban pynshlur ïa ki nongshong shnong ka jylla ba kin pynrung kyrteng bad pynïasoh ïa ka Aadhaar bad ka MHIS Card.
“Kim don jingngeit ha ka Adhaar, kim don jingngeit ha ka MHIS tad haduh ba ynda la pang jur i bahaïing jong kato ka ïing, la kubur ka Myntri.
Ka la ong na ka liang jong ka sorkar ka la ju pynkynmaw ïa ka tnad ka koit ka khiah na ka por sha ka por ban pynsngewthuh paidbah bad ban kren halor ka jingdonkam ban pynïasoh ïa ka Adhaar bad ka MHIS.
Ka Myntri ka la ong ba ka sorkar mynta ka la nang kham pynsuk shuh-shuh ïa ki paidbah ba kin pynrung kyrteng ban pynïasoh ïa ka Aadhaar bad ka MHIS bad ka la ong ba watla ki don ki katto katne ki jingwit hangne hangtei hynrei lada ki paidbah ki leh ïa kata ha ka por kaba biang kam don jingeh satia ïa ki.
“Ki don katto katne ki jingwit tangba lada u paidbah um leh ïa kata ha ka por ba u koit bad u khlaiñ, kan sa don ka jingeh ynda ki la pang jur, ngi la ong ban leh ïa kine khnang ba lada wan kano-kano ka jinpang ne ka jingshah ban beiñ halor kano-kano ka rukom, lada phi leh lypa kan bha”, la ong ka Myntri.
Shuh shuh ka Myntri ka la ong ka long kaba donkam ba ki paidbah kin ïatreilang ryngkat bad ka sorkar khnang ba kin ym mih kino-kino ki jingeh hadien habud bad ka ban long pat ka jingmyntoi ïa ki paidbah nongshong shnong ka jylla hi baroh kawei.
“Lada ïatrei ryngkat, kan nym don ka jingeh hynrei kumba ka long mynta ki bun ki kynrum-kynram bad ki jingbym sngewthuh, ka tnad ka dei mynta ban pynsuk ïa ka jingsngewthuh ïa ki khubor kiba ngi ai ïa u paidbah ban peit ba kan nym don ka jingartatien”, la kubur ka Myntri.
