Shillong, Rymphang 12
U MLA ka Amlarem konstitwensi u Bah Lahkmen Rymbui u la tan ïa ki heh shipai BSF bad buh jingkylli halor ka jingshah leh tohmet u ophisar ka tnat ri jingri ka Sorkar Jylla, u Dr Seiboklang Buam ha Muktapur kaba don ha khappud hapdeng ka India bad Bangladesh.
U Bah Rymbui uba dei ruh u nongaibuit ka Sorkar MDA u la ïakynduh bad ki shipai BSF ha kamra jong u ha Secretariat bad ïakren shaphang kaei kaba la jia ïa u ophisar ka Sorkar Jylla ha Muktapur.
Haba ïakren bad ki nongthoh khubor, u Bah Rymbui u la ong ba ha ka jingïakynduh, la ïakren ba kum kane ka jingjia kam dei kaba wanrah ka jingïajan bad ki paidbah bad kam dei ban jia shuh namarba kum kane ka jingjia kin don kiba shim kabu ban leh kiei-kiei kiba wanrah ka jingbym sngewtynnad.
U Bah Rymbui uba la long teng kum u Myntri ka tnat pulit, u la ong ba ki shipai BSF ki la mynjur ban tyngkan haba pyndep ïa ka kamram jong ki ha khappud bad kane ka jingjia kam dei ban jia shuh.
U la ong ba la pynkynmaw ruh ba ki pulit bad ki shipai BSF ki dei ban don ka jingsngewthuh kumjuh ruh bad ki paidbah namarba ki shipai BSF ki dei ban ïada ïa ki paidbah ha khappud.
U la ïathuh ba na ka liang ki shipai BSF bad pulit kin pynlong ka jingtohkit ban lap ïa ka daw tynrai khnang ba donkam leh ei ei ïa kiba donkti ynda la lap ka jingshisha.
Ha kane ka jingïakynduh la donlang u Inspector General (IG) bad ki ophisar na ka tnat pulit.
U Bah Rymbui u la ong ba u SDO (Civil) Amlarem bad SDPO Amlarem ruh ki la pynlong ïa ka jingïakynduh bad ki nongshong shnong.
La kynnoh ba ki shipai BSF ki la byrngem ban siat ïa u ophisar ka Sorkar Jylla, bad na kane ka daw kan don ka jingtohkit da ki pulit bad BSF.
Kumta u Bah Rymbui u la ong ba u kyrmen ba ka jingshisha kan paw shen haba ïadei bad kane ka jingjia.
Ym shym la don kano kano ka jingbuhpor ïa ki shipai BSF bad pulit ban pyndep ïa ka jingtohkit.
Na ka liang u ophisar ka tnat ri jingri ruh u la ujor haba ïadei bad kaei kaba la jia ïa u.
