Shillong, Rymphang 12
U MLA ka United Democratic Party (UDP) na Mawsynram, Bah Ollan Sing Suin, u la ong ba ka ktien Hindi bad English la shim ïa ki kum ki ‘official language’ ne ka ktien jong ka Ri India, bad kumta ka jingpyrshah ïa ka jingpyndonkam ïa ka ktien Hindi hapoh ka ïingdorbar ka long ka bym shongnia satia.
Kane ka jingkren bad pynpaw jong une u MLA ka Mawsynram ka la long hadien ba ka seng Liang Pyrshah hapoh ïingdorbar ka Voice of the People’s Party (VPP) ka la ong ba kan pyrshah lada u Lat ka Jylla un ai jingkren da ka Hindi ha ka sngi sdang ïa ka Dorbar Mang Tyngka ka ban sdang naduh ka 16 tarik haduh 27 tarik mynta u bnai, hynrei hadien ka la pynpaw ka jingsngewhun ba la kular ban pynbiang ka jingthoh ba la pynkylla sha ka phareng sha baroh ki MLA.
U Bah Ollan Sing Suin u la kyntu ba ka jingwanrah ka jingpyninia ne hylla hapoh ka ïingdorbar ynda kren u Lat da ka Hindi ka long ka bym donkam satia, naba na ka liang jong u Lamphang u la dep ban ai ka jingkular ban pynkylla ïa ka jingkren sha ka ktien Phareng sha baroh ki MLA.
U Bah Suin u la ong, “Nga ruh ngam da dei uba nang ban kren ktien Hindi, hynrei ngi burom pat ïa u Lat uba dei u khlieh ka riti synshar, kumta ban shu pyni ne pynmih slogan ne pynmih sur hylla lada kren hindi u Lat kan nym long kaba dei naba ka dei ka ktien jong ka Ri.”
Nalor nangta, u la ong ba u Lat u lah ban kren da ka ktien Hindi haba um lah ban kren phareng. Kumta kam dei ban mih kano-kano ka mat naba ka hindi ruh ka dei ka ktien sorkar ryngkat bad ka ktien phareng.
