Shillong, Rymphang 13
U Symbud Myntri Rangbah, Bah Prestone Tynsong, u la ïathuh ba ki dang don ki jaka ha West Jaiñtia Hills district bad East Khasi Hills district kiba ym pat lah ban ker sainar shiah namar ka tnat Korbar Ri (MHA) ka Sorkar Pdeng ruh kam pat jubab sha ka Sorkar Jylla haba ïadei bad ka jingtei ïa ka jingker ha ki jaka kiba donkam ban tei kham shajan u ‘Zero Line’.
Ïa kane la ïathuh da u Bah Tynsong haba kylli halor ka jingbym shngaiñ ki jaka ha khappud bad ka Bangladesh namar ki don ruh ki runar kiba wan rung tuh shapoh u pud u sam ka India bad leh ïa ki kam runar.
U la ong ba ka Sorkar Jylla ka la dep thoh shithi sha ka MHA ban kyrpad ban shah ban ker kham shajan u ‘Zero Line’ ha ki bynta jong ka East Khasi Hills bad West Jaiñtia Hills district hynrei ym pat ïoh jubab haduh mynta.
Kumta u la ong ba katba dang ap ïa ka jubab na ka MHA, ka jingker sainar shiah ruh ka dang sahteng bad ym pat shah ban pynïaid shakhmat ha kito ki jaka.
Namarkata, u Symbud Myntri Rangbah u la ong ba u la bthah ïa ki shipai BSF ban pynkhlaiñ ka jingpahara bad peitngor ha khappud ban khanglad ïa kino-kino ki kam runar kiba shim kabu ban leh da ki mynder kiba wan rung tuh shapoh u pud u sam ka India.
