Shillong, Rymphang 12
Ka Sorkar Jylla ka la rai ban don noh da ka Standing Coordination Committee ha ki Civil Sub Division kiba don ïa ki jaka kiba hap ha khappud ka India bad Bangladesh khnang ban khmih bad pynbeit shisyndon haba mih kano-kano ka jingeh kynthup ka jingïakajia hapdeng ki shipai khappud (BSF) bad ki paidbah.
Ïa kane ka rai la shim ha ka jingïalang kaba la lum da u Symbud Myntri Rangbah u Bah Prestone Tynsong uba peit ïa ka tnat pulit hadien ka jingjia shah leh tohmet u ophisar ka tnat ri jingri ha Muktapur ha ki shipai BSF ha ka 11 tarik mynta u bnai.
Ha ka jingïalang la donlang ki heh ophisar ka Sorkar, ki ophisar na ka tnat pulit kynthup ïa u DGP nalor u Inspector General (IG) BSF bad kiwei kiwei.
Haba kren sha ki lad pathai khubor, u Bah Tynsong u la ong ba ïa ka Standing Coordination Committee yn long Chairman da u SDO (Civil) bad ki dkhot ki kynthup ïa u Sub Divisional Police Officer (SDPO), u Company Commander na ka BSF kumjuh ruh ki nongsynshar shnong bad na ki shnong kiba don ha khappud ka Jylla bad ka Bangladesh.
U Bah Tynsong u la ong ba lada don kano-kano kaba hap ban pynbeit, kane ka Committee kan sa shim ban pynbeit ïa ki jingeh hadien habud bad poi sngewthuh jingmut. Kane ka Committee kan lum jingïalang ruh man ka por bad la kumno kumno shisien shibnai ne man la ka arsien shibnai katba shah ka kam kampher wat lada kam don kano-kano ka jingjia.
U la ong ba kane ka Committee kan don ruh ha kiwei ki Civil Sub Division kiba don ki jaka kiba hap ha khappud bad ka Bangladesh.
Haba kylli shaphang kaei kaba la jia ïa u Dr Seiboklang Buam, uba trei ha Muktapur Veterinary Dispensary, u Bah Tynsong u la ong ba ha ka jingïalang ha Muktapur ha ka sngi nyngkong, baroh ki la mynjur ban pynbeit noh bad la dep ban pynbeit.
Ka Muktapur Veterinary Dispensary, ka hap ha Amlarem Civil Sub Division ha West Jaiñtia Hills district.
Kumta u la ong ba ym donkam shuh ban pynlong kano kano ka jingtohkit namarba ki arliang mamla ruh ki la ïa beit lang.
