Shillong, Rymphang 13
U President rangbah jong ka Voice of the People Party (VPP), u Bah Ardent Miller Basaïawmoit, u la ther da kaba tyngeh ïa kito ki nongïalam kiba ong ba kam lei-lei lada pyndonkam da ka ktien Hindi hapoh ka ïingdorbar thawaiñ ka jylla.
Haba ai jingkren ha ka jingïalang pdiang ïa ki nongïalam bad ki dkhot jong ki seng saiñ pyrthei bapher bapher kiba la wan pynïasoh bad ka VPP kaba la long ha ka Sngi Ba-ar, u Bah Ardent u la ong ba ka jingpyrshah jong ka seng VPP ban pyndonkam da ka ktien Hindi hapoh ka ïingdorbar thawaiñ ka jylla kam dei ka jingpyrshah kaba khlem nongrim.
U la ong ba kaba sngewsih ka long ban ïohi ha kine ki sngi, ki nongïalam jong kiwei pat ki seng saiñ pyrthei ki la pyrshang ban pynpaw ba kam lei-lei lada kren ne pyndonkam da ka ktien Hindi hapoh ka ïingdorbar thawaiñ.
“Hynrei kaba sngewsih ka long ba ha kine ki sngi la ïohi ba ki nongïalam jong kiwei pat ki seng saiñ pyrthei kiba pyrshang ban pynpaw ba sa lei da kren da ka ktien Hindi. Hato ka ktien kam dei sieh ka nongrim jong ngi? Hato ka ktien kam dei sieh ka dawbah kaba pynlong ïa ki nongïalam jong ngi ba kin ïoh ïa la ka jong ka jylla?”, la buh jingkylli u Bah Ardent.
U la ong ba lada ym dei na ka ktien, kum ka jylla bad ka jaitbynriew kan dang hap hapoh ka jingshah synshar ha ka jylla Assam haduh mynta bad yn nym pat ïohlad ban long MLA.
U la ong ba ka jylla ka sdang ïa ka jingïakhih ban ïoh ïa ka jylla lajong ka dei na ka nongrim jong ka ktien bad lada ngi ïoh ïa ki nongïalam jong ngi mynta kiba biang bad hun beit ban kren da ka ktien Hindi hapoh ka ïingdorbar ka la long tang ka jingpynksan jubor jong ki.
U la ong ba shano ka Jaitbynriew jong ngi kan poi lada ki nongïalam kum kine ki ïalam bakla ïa u paidbah bad shano ka Jaitbynriew jong ngi kan poi lada synjor ka nongrim jong ka jaitbynriew bad hato ka long sieh ïa ngi ban ïa jngi lang ha ka duriaw bah jong ka Ri India.
“Shano ka Jaitbynriew jong ngi kan poi? Lada ki nongïalam kiba kum kine ki ïalam bakla ïa u paidbah. Shano ka Jaitbynriew jong ngi kan poi lada synjor ka nongrim jong ka Jaitbynriew? Ka long sieh ïa ngi ba ngin ïa jngi lang ha ka duriaw bah jong ka Ri India ba ngin ïa rung lang noh bad kiwei pat”, la buh jingkylli biang u Bah Ardent.
“Ban ong ba kam lei-lei kata ka ktien jong nga lada ym kren ruh biang, hato ka long sieh ba ngin ïakren shuh da ka ktien lajong? Hato ka don sieh ba ngin ong ba ngin nym ïada ïa ka ktien lajong?”, la buh jingkylli biang u Bah Ardent.
U la ong ba dei namar kata ka daw ba ka seng VPP kan leit sha ki paidbah da ka nongrim bad ban ieh ha u paidbah ka jaitbynriew ba hato ki kwah ne em ban pynim ïa ka ktien Khasi.
“U paidbah u pdiang ne em ba na Delhi kin ong ba ngi dei ban thoh ban kren noh da ka Hindi? U paidbah jong ngi u lah ne em ban leh eksam nangne shakhmat da ka ktien Hindi?”, la buh jingkylli u Bah Ardent.
Shuh shuh u Bah Ardent u la ong ba ki MLA bad ki Myntri mynta ki ïasaid ban pynïoh ïa kiwei pat ki jaitbynriew ba kin ïoh ban thied jaka puta hapoh kane ka khyndew ka shyiap jong ka jylla.
“Ngi te ngi ong em, ka khyndew ka shyiap ka dei jong ngi bad kane ka ri ka dei ka Ri kynti jong ngi”, la ong u Bah Ardent.
U Bah Ardent u la ong ba kum ki nongïalam ki kwah ba ki paidbah haba ki ai ka jingkyrshan ïa ka seng, kin tip ïa ka daw ba ki kyrshan namar ba kane ka seng kan ïeng ban wanrah biang ïa ka burom bad ban pynneh pynsah ïa ka ktien ka thylliej, ka khyndew ka shyiap bad ban ïada ïa ki khun samla jong ngi khamtam ha ka kam ka jam bad kumta ter-ter.
